FFTL Organiza Sorumutuk Anuál ho Asosiasaun Membru sira, “Hanoin Ida Transforma Futeból Sai Orgullu Nasionál”

Sorumutuk Anuál FFTL ho asosiasaun membru sira ne'ebé hala'o iha Otél Timor, Domingu (30/11/2025). Imajen/Rafa.tl

DILI, RAFA.tl – Federasaun Futeból Timor-Leste (FFTL), Domingu (30/11/2025), organiza sorumutuk anuál ho asosiasaun membru sira hodi deskute kona-bá dezenvolvimentu futeból Timor-Leste ho hanoin ida transforma futeból sai orguillu nasionál.

Notísia Relevante: FIFA Nomeia Prezidente FFTL Nilton Telmo Gusmão dos Santos Ba Komité Permanente Anti-Rasízmu no Deskriminasaun

Prezidente FFTL, Nilton Telmo Gusmão dos Santos, iha diskursu abertura, hateten sorumutuk anuál FFTL ho asosiasaun membru ba tinan 2025 ne’ebé hala’o iha Otél Timor, Dili, ho tema “Hanoin ida transforma futeból sai orgullu nasionál”.

Nilton Telmo Gusmão dos Santos haktuir, FFTL iha ona planu no hanoin atu organiza ba oin sorumutuk anuál ne’e bele sai hanesan kalendáriu nasionál ba federasaun iha tinan  sira tuir mai. Importante tebes atu bele organiza enkontru anuál sira hanesan ne’e iha tinan ikus (fim do ano) atu bele tau hanoin hamutuk  fó sai viziaun sira ba federasaun no mós rona husi membru asosiasaun sira, atu rikese organizasaun nia planu no mós organziasaun nia lalaok durante tinan ida hodi bele prozeta nafatin federasaun ho programa sira ba futuru.

Nia afirma iha sorumutuk ho membru asosiasaun sira, hamutuk ho oradór futeból sira ne’e importante hodi rona no tau hamutuk opiniaun realiza atividade futeból ne’ebé ho diak no modernu ba Timor-Leste.

“Futeból atividade ida ne’ebé dinámika tebes, maibé ita konsentradu liu oinsá organiza futeból iha kampu laran, maibé iha realidade futeból ohin nakonu ho atividade diversifikadu oin-oin, ne’ebé rikese liután futeból. Tanba ida-ne’e mak importante teb-tebes ita atu organiza bebeik sorumutuk hanesan ne’e, atu bele tau hamutuk ita-nia hanoin atu bele rona hanoin husi oradór sira no vijaun jerál hodi halo dezenvolvimentu iha FFTL,” prezidente FFTL, Nilton Telmo Gusmão dos Santos esplika.

Prezidenti FFTL ne’e argumenta katak atu transforma futeból ne’ebé diak presiza tuur hamutuk  ho vizaun ida hodi lori Timor-Leste ba futeból ida modernu.

Nia haktuir enkontru informál sira dalaruma sempre halo entre federasaun ho oganizasaun sira, bainhira hasoru malu ko’alia beibeik, maibé importante halo enkontru formál sira hanesan ne’e, atu bele alinea diak liután pozisaun ba futuru.

Tuir Nilton Telmo Gusmão dos Santos, futeból modernu la ko’alia de’it, maibé tenke organiza atu lori jerasaun ba li’ur, no ida-ne’e  bele akontese bainhira hotu-hotu hamutuk, haforsa planu no mós bele eleva liután koñesimentu husi parte hotu, hodi tau hamutuk vizaun ida, hodi nune’e, bele hamutuk iha misaun bo’ot ne’ebé ema sempre dehan transforma futeból sai nu’udár orgullu nasionál.

“Ha’u hakarak dehan atividade ida ne’e sai hanesan kalendáriu ba federasaun iha tinan ne’e no mós prozesaun tinan 5 no tinan 10 ba oin. Se bele la’ós dala ida, pelemenus tinan ida dala-rua ka tolu, para fortifika liután ita-nia fundasaun ka organizasaun para ita haré futeból ne’e, ita haré ho objetividade ida hanesan. Ohin, ita sei simu kritika barak-barak ne’ebé ita hetan ba jogu sira, tanba ida ne’e mak presiza sorumutuk hanesan ne’e atu haré saida mak akontese ona iha organizasaun federasaun foteból nia laran,” Nilton hateten.

FFTL hanesan organizasaun ida ne’ebé eziste tinan barak ona, maibé nafatin iha difikuldade lubuk ida hodi sai obstaklu ba organizasaun ne’e rasik, ne’ebé tinan ida ona lidera FFTL hamutuk ho estrtura sira, ne’ebé durante fulan-sia (9)  hodi restaura konfiansa husi FIFA no AFC nian ba FFTL signifika katak tenta halo esforsu hotu-hotu para kumpre rekezitu sira ne’ebé organizasaun inan koloka ba atividade  jogu Futeból Timor-Leste nian.

Prezidenti FFTL, Nilton Telmo Gusmão dos Santos ho orgullu konsege esforsu prienxe fila-fali rekezitu sira AFC ho FIFA nian, ne’ebé hatudu iha ona prosesu ida ne’ebé hodi restaura ho posibilidade para oraganiza fila-fali jogu sira, tanba ne’e mak sei realiza fila-fali atividade jogus sira.

Nilton Telmo Gusmão dos Santos husu membru asosiasaun munisipál sira ho objetivu ida hodi organiza fila-fali  dezenvolve  aktividade futebol iha munisípiu sira.

Reportajen ekipa Rafa.tl