Ouvir RAFA Ritmo, Voz e Coração de Timor
Díli, 19 Outobru 2026 (RAFA) – Prezidente Federasaun Futebol Timor-Leste (FFTL), Nilton Telmo Gusmão do Santos, informa konstrusaun estádiu foun ho padraun internasionál iha Tasi-Tolu planeia atu hahú iha tinan 2027. Maibe, hein sinal konkretu husi Governu kona-bá apoiu finanseiru no kooperasaun hodi asegura realizasaun projetu ne’e.
“Tinan oin, ita hotu hakarak projetu ne’e bele hahú. Pelumenus, tenke iha ona sinal konkretu ne’ebé hatudu katak projetu ne’e sei realiza duni,” Nilton Gusmão informa ba jornalista sira, iha Otél Timor, Díli, Sábadu-ne’e.
Nia fó ezemplu bele planeia atu hala’o serimónia lansamentu primeira pedra, halo akordu kooperasaun no asegura apoiu finanseiru husi parseiru sira, inklui FIFA no Governu liuhusi Ministériu Planeamentu no Investimentu Estratéjiku (MPI), atu bele iha konfiansa katak projetu ne’e sei la’o ba oin.
Nia hatutan, preparasaun ba projetu ne’e la’o di’ak, ho governu nia apoiu inklui halo ona indeminizasaun.
“Prosesu ne’e lao di’ak tebes. Ministériu Justisa no entidade responsavel ba rai no propriedade tulun tebes FFTL. Sira halo ona levantamentu dadus kona-baá ema sira ne’ebé hela iha área ne’e no prosesu indemnizasaun, hodi bele liberta rai ne’e atu ita bele harii estádiu foun,” nia esplika.
Prezidente FFTL afirma federasaun sei konsidera ajustamentu balu ba dezeñu estádiu foun, tuir opiniaun husi komunidade amante futebol, maibe kapasidade estádiu sei la liu espetadór 20.000, tuir nesesidade no kapasidade Timor-Leste.
“Dezeñu ne’e, ita rona mós ona opiniaun oioin husi komunidade amante futebol, no karik ita bele halo ajustamentu balu. Maibé, ita tenke halo tuir kapasidade ne’ebé ita iha,” Nilton Gusmão siblina.
Nia mós relata kapasidade estádiu ne’e sei la liu espetadór 20.000, tanba estádiu ho kapasidade 80.000 ka 90.000 espetadór nian apropriadu liubá nasaun sira iha Europa.
Jornalista: Marito da Costa
Written by: RafaFM
FFTL Hein Sinál Konkretu husi Governu Ba Projetu Estádiu Foun ho Padraun Internasionál iha Tasi-Tolu
todayNovember 20, 2026 7 3
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt