FFTL Estende Kontratu Treinadór José Pedro To’o Tasa FIFA ASEAN

FFTL foti ona desizaun hodi estende kontratu treinadór selesaun nasionál, José Pedro to'o jogu finál tasa FIFA ASEAN  2026.

Díli, 10 Agostu 2026 (RAFA) – Federasaun Futeból Timor-Leste (FFTL) foti ona desizaun hodi estende kontratu treinadór selesaun nasionál, José Pedro Alves Salazar to’o finál Tasa FIFA ASEAN  2026.

Tasa FIFA ASEAN sei hala’o iha loron 24 fulan-Setembru to’o loron 3 fulan-Outubru tinan 2026. Torneiu rejionál foun ida-ne’e iha ekipa 14 ne’ebé fahe ba Divizaun Premieru ida ne’ebé organiza iha Indonézia no Segundu Divizaun ne’ebé organiza iha Hong Kong, ne’ebé hala’o durante janela internasionál ofisiál FIFA nian.

Diretór Selesaun Nasionál FFTL, João Maneco Soares Amaral,  Segunda-ne’e, informa treinadór José Pedro Alves Salazar inia mandatu  sei termina iha loron 30 fulan-Agostu  ne’e, ho  nune’e, FFTL deside kontinua nia mandatu ne’e to’o tasa FIFA ASEAN  remata.

“Federasaun tetu kestoins balun liga ho jogu importante sira tuir mai iha loron 24 Setembru, jogu Tasa FIFA ASEAN tanba haré tempu ne’ebé mak limitadu tebes, tan ne’e, FFTL deside fó tan oportunidade ba José Pedro espesialmente ba de’it Tasa FIFA ASEAN,” João Maneco Soares Amaral informa ba jornalista sira iha FFTL.

Nia fó razaun katak, FFTL estende treinadór ninia mandatu ne’e mós FFTL hatuur alvu ba nia tenke lori jogadór sira sai kampiaun iha divizaun segundu nune’e bele ba kontinua kompete iha divizaun primeiru.

Iha Tasa FIFA ASEAN ne’e Timor-Leste grupu ida ho Kambodia no Laos, tanba ne’e FFTL hatuur alvu ba José Pedro tenke sai kampiaun iha jogu ne’e.

João Maneco Soares Amaral mós haktuir orientasaun ne’ebé hetan husi rezultadu enkontru entre Prezidente FFTL, Nilton Telmo Gusmão dos Santos, ho nia direjente sira, klaru ona katak ida-ne’e oportunidade ikus ba treinadór José Pedro atu hatudu nia rezultadu servisu.

Nia afirma tan katak, bainhira treinadór la atinji alvu ne’ebé iha, maka FFTL mós deside ona figura balun atu troka nia.

Jornalista: Cesarina de Carvalho