Feira Nasionál iha Tasi-Tolu, Promove Produtu husi Setór Públiku ho Privadu

Grupu empreza ETO liuhosi nia empreza subsidiáriu fabrika bee GOTA hola parte iha Feira Nasionál, 28 Novembru iha Tasi-Tolui. Imajen/Rafa.tl

DILI, RAFA.tl – IX Governu Konstitusionál organiza feira nasionál iha Tasi-Tolu, hodi komemora tinan-50 Proklamasaun Independénsia (28 Novembru 1975-28 Novembru 2025) ho objetivu promove produtu husi setór públiku no privadu ba merkadu nasionál no rejionál to’o internasionál.

Notísia Relevante: Governu Prevé Rihun US$70 Ba Feira Nasionál iha Tasi-Tolu

Iha Segunda lorokraik, (24/11/2025), Prezidente Repúblika (PR), José Ramos-Horta, halo abertura direta ba feira nasionál ne’ebé organiza husi governu, liuhosi Komisaun Nasionál Komemorasaun tinan-50 Proklamasaun Independénsia husi Ministériu Administrasaun Estatál (MAE) hamutuk ho Ministériu Komérsiu no Indústria (MCI).

Iha feira nasionál ne’e, iha mós espozisaun husi pavilaun munisípiu 13, inklui Ataúro hodi hatudu patrimóniu kulturál, ne’ebé munisípiu ida-idak iha, halo mós promosaun ba setór turizmu no aprezenta rikusoin ne’ebé munisípiu iha hodi atrai no dada vizitante sira.

Iha setór públiku no privadu, empreza públika no empreza privada, sira mós ida-idak halo promosaun ba produtu iha área negósiu oi-oin, hodi hatudu ba públiku produtu sira ne’ebé empreza nasionál sira iha.

Grupu Empreza Esperança Timor Oan (ETO), liuhosi nia empreza subsidiária, sira partisipa mós iha feira nasionál ne’e hodi aprezenta ba públiku, produtu sira ne’ebé grupu ETO iha.

Koordenadór produsaun bee GOTA, Tobias Tavares Pires, ba Rafa.tl iha Tasi-Tolu, hateten feira ida ne’e fó benefísiu ba empreza maka oinsá atu promove liu tan produtu sira ne’ebé pertense empreza subsidiária grupu ETO nian  ba iha públiku, liu-liu ba konsumidór sira ne’ebé maka sempre konsumu bee GOTA.

Liuhosi feira ida ne’e mós oinsá atu esplika ba konsumidór sira kona-bá kualidade bee GOTA nnian ne’ebé halo produsaun tuir padraun internasionál.

“Feira ne’e fó benefísiu di’ak mai ami GOTA atu promove ami nia bee, produtu lokál atu nune’e komunidade iha koñesimentu liután. Ami rasik produz bee ne’e, ami garante nafatin nia kualidade, atu nune’e, ita nia bee bele distribui di’ak liu tán ba iha merkadu nasionál,” Tobias Tavares Pires esplika.

Koordenadór produsaun Bee GOTA garante ba konsumidor sira ne’ebé konsumu bee GOTA saudável no kualidade ne’ebé maka di’ak tuir padraun internasionál.

Nia subliña, GOTA nafatin produs bee hemu tuir padraun  ne’ebé maka iha, atu nune’e bele garante tuir nia kualidade.

GOTA iha rasik laboratòriu ne’ebé tuir padraun nasionál ho internasionál, hodi halo teste ba kímiku ho mikróbiku hodi garante kualidade.

Iha inísiu feira ne’e konsumidór sira kuaze kompra bee GOTA kaixa no garafa 600 mil-litru nian.

Iha fatin hanesan, Prezidente Autoridade Munisípiu Baucau, Veneranda Lemos Martins hateten, feira ida-ne’e hanesan meius ida ne’ebé maka governu sentrál halo hodi loke oportunidade ba munisípiu hotu-hotu, atu lori sira nia potensialidade hodi esplora produtu saida maka kada munisípiu iha, hahú husi uma tradisionál, husi kulinária hodi fó mos oportunidade ba negósiu ki’ik sira.

Nia haktuir, Baucau rasik aprezenta produtu potensiál sira munisípiu nian hanesan produtu lokál, kulinária no mós produtu sira agríkola ho artezanatu sira.

“Ami lori produtu sira hanesan artezanatu ne’ebé halo ho nuu nia kulit, ne’ebé bele halo ba tapeti, bele halo ba ai-funan fatin. Ami moó lori produtu lokál hanesan kulu, iha mós kumbili, ami mós iha produsaun fos,” Veneranda Lemos Martins informa.

Iha sorin seluk, Prezidente Autoridade Munisípiu Ataúro, Mateus Belo, sente kontente tanba sira bele lori sira nia produtu Indústria kreativu sira komunidade nian ba iha públiku, no liu husi feira ne’e mos komunidade sira bele hetan rendimentu husi kreativu ne’ebé maka komunidade sira iha.

“Ita lori maka produtu tradisionál sira, liu-liu tasi nian, tanba komunidade Ataúro maioria peskadór. Produtu sira ne’ebé ami lori hanesan ikan, budu Tasi, kurita, no mos ai-han tradisionál,” Mateus Belo hateten.

Prezidente Komisaun Organizadora Nasionál atuál Ministru Administrasaun Estatál, Tomás do Rosário Cabral, iha nia intervensaun badak iha abertura feira nasionál ne’e hatete, atividade sira seluk ne’ebé hala’o tiha ona mak hanesan jogu amigáveis entre liñas ministeriais sira, ne’ebé sei remata iha loron 29 Fulan-novembru oin mai.

Nia hatutan, sei iha mós divertimentu husi grupu sira ne’ebé mai husi área fronteira, no mós grupu Timoroan sira ne’ebé mai husi Austrália, sira ne’ebé sai husi Timor durante 50-anos nia laran.

Tuir observasaun Rafa.tl iha terenu haré katak, situasaun iha Tasi-Tolu kontroladu no mantein kalma, tanba hetan seguransa másimu husi Polísia Nasionál Timor-Leste (PNTL) no FALINTIL- Forsa Defeza Timor-Leste (F-FDTL).

Pavilaun sira ne’ebé estabelese iha feira nasionál ne’e hetan mós vizita husi Prezidente Repúblika, José Ramos-Horta, membru Governu sira inklui mós konvidadu internasionál sira hodi konsumu produtu lokál sira ne’ebé maka prepara iha pavilaun idak-idak.

Reportajen ekipa Rafa.tl