Federasaun Futeból Timor-Leste Lansa Troféu “Taça da Liga” 2025

FFTL lansa troféu “Taça da Liga” 2025 iha Otél Timor, Tersa (13/01/2026). Imajen/Rafa.tl

DILI, RAFA.tl – Prezidente Ezekutivu  Federasaun Futeból  Timor-Leste (FFTL), Nilton Telmo Gusmão dos Santos,  hamutuk ho Primeiru-Ministru Kay Rala Xanana Gusmão  nu’udar mós Prezidente ba klubu AD SLB Laulara, Tersa kalan (13/01/2026), iha Otél Timor,  lansa  troféu “Taça da Liga” 2025.

Notísia relevante: FFTL Sei Realiza “Taça da Liga FFTL”, ETO Group Apoiu US$35,000.00

“Taça da Liga” ne’e sai hanesan kompetisaun regular Federasaun Futeból Timor-Leste nian iha kada époka no sei partisipa husi klubu sira primeira no segunda divizaun.

Prezidente  FFTL, Nilton Telmo Gusmão dos Santos, iha nia diskursu hatete, kompetisaun ba  “Taça da Liga” sai hanesan kalendáriu FFTL nian iha ne’ebé antes tama  ba  liga Federasaun sei hala’o uluk jogu ba  “Taça da Liga” iha pra- époka, atu nune’e, bele fó kondisaun no fasilita finanseiru ba klubu sira molok kompete iha liga.

“Objetivu husi hala’o Taça da Liga nu’udar atividade anuál ne’ebé FFTL tau ona iha nia kalendáriu sai nu’udár atividade regulár ba ita-nia atividade futeból Timor-Leste nian, hanesan atividade pre-époka antes ita tama ba liga. Depois de taça de liga, ita organiza tiha hodi bele fó kondisoens ida di’ak liubá klubu sira, ida-ne’e atividade ne’ebé sai hanesan kalendáriu FFTL nian, tanba liga órgaun independente seluk mak organiza, la’ós FFTL, maibé FFTL iha nia responsabilidade tomak, atu bele fó nafatin espasu ba klubu sira hodi oinsá organiza sira-nia atividade desportiva sira,” prezidente FFTL Nilton Telmo Gusmão dos Santos hateten.

Nia esplika FFTL hamosu inisiativa ida-ne’e (taça da liga), atu bele fó biban ba klubu sira molok atu ba liga, nune’e sira bele iha kapasidade finanseira natón, tanba ne’e FFTL pepara prémiu ruma ne’ebe bele ajuda klubu sira hodi prepara sira nia kondisoens molok tama ba faze liga époka 2026 nian.

Lideransa másimu FFTL ne’e hatutan,  “Taça da Liga” ne’e hanesan taça ne’ebe úniku, tanba sei kompete husi  ekipa primeira divizaun inklui segunda divizaun.

“Ita iha serimónia simples ida ne’e, mai hamutuk atu lansa ita nia taça  de liga 2025. Ita sei iha dezafiu seluk, tanba ita nia órgaun liga,  sei iha hela problema balun, maibé ha’u fiar katak  solusaun sempre iha,  bainhira ita buka tur hamutuk no ko’alia hodi hetan solusaun  ba ita nia órgaun liga. Ita hahú uluk lai ho ita nia taça de liga, sei sai hanesan, taça ida ho prestijiu, tanba desputa entre primeira divizaun, segunda divizaun, ida ne’e la signifika katak nia prestijiu ne’e menus, maibé ha’u fiar katak, segunda divizaun sira sei aprezenta sira nia jogu ne’ebé kompetetivu hodi hatudu ba primeira divizaun sira katak, segunda divizaun mós iha kualidade, mai tan ho nia taça ne’ebé ha’u rasik mos konsidera furak tebes, nia taça ne’ebé diferente ho taça sira bai-bain durante ne’e ita hare,” Nilton Telmo Gusmão dos Santos hateten.

Iha jogu  “Taça da Liga” époka 2025 sei kompete husi Klubu primeira no segunda divizaun hamutuk 13, kompostu husi ekipa Karketu Díli F.C, Assalam F.C, F.C Coração, AD SLB Laulara, F.C Porto Taibessi, Emanuel F.C, DIT F.C, As Marca, Aitana F.C,  Nagarjo F.C, Fitun Estudante Lorosa’e F.C, Santa Cruz F.C,  no Lica-lica lemorai F.C.

Tuir oráriu, jogu abertura ba “Taça da Liga” époka 2025 sei joga entre Klubu AD SLB Laulara hasoru Emanuel F.C iha Sábadu (17/01/2026), iha Estádiu Munisipál Díli.

PM Xanana Parabeniza FFTL

Primeiru-Ministru (PM), Kay Rala Xanana Gusmão, parabeniza Prezidente Ezekutiva Federasaun Futeból Timor-Leste (FFTL), Nilton Telmo Gusmão dos Santos, hamutuk ho estrutura tomak FFTL tanba iha vontade no inisiativa di’ak hodi realiza “Taça da Liga” époka 2025 hodi hamoris dezenvolvimentu Futeból iha Timor-Leste.

Primeiru-Ministru (PM), Kay Rala Xanana Gusmão,  hato’o iha ámbitu aprezentasaun troféu Taça da Liga no husu ba Federasaun Futeból Timor-Leste atu kontinua realiza  jogu sira hanesan ne’e atu nune’e bele motiva jogadór sira no  bele buka fini foun ba jogadór sira iha rai laran.

“Atu dehan de’it fó parabens ba Prezidente FFTL  ho inisiatva ida ne’ebé di’ak tebes, ita nia problema mak ida ne’e, halo tiha depois para tiha . Neneik-neneik ha’u mos fiar katak  sei iha joga di’ak kuandu ita la’o ona ba oin ha’u sente katak sei iha emprezáriu balun, no kuandu ita iha ona emprezáriu ne’ebe di’ak, kompañia Timor oan ne’ebé di’ak hakarak fó apóiu klubu sira bele moris ho kbiit liu tan,” Kay Rala Xanana Gusmão hateten.

Xefe governu mós rekoñese, iha dezafiu oioin ne’ebé akontese iha Futeból Timor-Leste, maibé Primeiru Ministru iha esperansa katak ho kolaborasaun de servisu sei bele lori dezenvolvimentu ne’ebé di’ak liu ba futuru iha área desportu.

“Ne’ebé dezafiu barak,  maibé ita hotu hamutuk, ne’e la’ós fali ita mak atu ba simu taça, ita nia oan, bei-oan sira, Timor tomak, tanba ne’e mak agradese tebes konvida prezidente SLB. Ita hotu ho kompromisu ida atu iha futuru, dizafiu barak ne’ebé ita bele ultrapasa ho oportunidade mosu karik ita bele hadi’a neneik-neneik,” Xanana subliña.

Prezidente Klubu AD SLB Laulara ne’e husu atu klubu no jogadór sira hotu ne’ebé sei kompete iha Taça da Liga époka 2025 atu mantein espíritu desportivu, Fair Play, disiplina, solidariedade no unidade, hodi hametin dezenvolvimentu Futeból iha Timor-Leste di’ak liután ba futuru.

Reportajen ekipa Rafa.tl