FATL Hala’o Formasaun Árbitru Atletismu Hodi Hakbiit Kualidade Rekursu Umanu

Fromasaun arbitrajen atletismu nasionál, Segunda 07 Setembru 2026.

Díli, 7 Setembru 2026 (RAFA) – Federasaun Atletismu Timor-Leste (FATL) hala’o formasaun kona-ba arbitrajen atletismu, ho objetivu atu hakbiit kapasidade no kualidade árbitru nasionál sira.

Prezidente FATL Afrânio Xavier Amaral ba jornalista sira, iha Díli,  Segunda-ne’e hatete, formasaun ne’e parte ida hodi prienxe rekezitu internasionál iha área arbitrajen atletismu nian.

“Formasaun ida ne’e bazeia ba data estatistika Asia Atletik nian menus demais, ita nasaun foun ladun dezenvolve rekursu umanu ne’ebé iha. Maibe, Ita hakarak partisipa beibeik ba eventu internasionál,” Afrânio Xavier Amaral subliña.

Prezidente Asian Athletics Association, Gen Dahlan Jumaan Al Hamad, alerta ba Governu Timor-Leste atu hadi’a sistema formasaun no sertifikasaun ofisiál ba árbitru sira. Tamba profisionalizmu árbitru importante atu sira iha kapasidade no kompeténsia ne’ebé adekuadu hodi dirije eventu internasionál sira, inklui eventu boot hanesan Díli Marathon.

Afrânio mós husu ba Governu atu aumenta investimentu iha dezenvolvimentu rekursu umanu, liuhosi formasaun kontinua iha área arbitrajen, atu kapasita sidadaun Timor-Leste sira hodi bele hala’o knaar ho profisionalizmu, imparsialidade no tuir padraun internasionál.

FATL rekomenda ba Governu atu haré didiak katak investimentu ba formasaun ne’e importante tebes. Tanba nasaun foun, rekursu umanu mak aspetu importante ba buat hotu.

Iha datin hanesan, Diretór Jerál Ministériu Juventude, Desportu, Arte no Kultura (MJDAC), David Tomas de Deus, konsidera formasaun ne’e importante hodi prepara rekursu umanu atu responde ba eventu desportivu sira iha futuru.

“Formasaun ida ne’e atu responde ba eventu sira ne’ebé ita organiza. Entaun, rekizitu ida atu ita bele lidera eventu mak tenke iha árbitru sira ne’ebé prienxe padra World Athletics,” hateten  David Tomas de Deus.

Nia subliña katak Ministériu sei kontinua monitoriza no avalia partisipante sira hafoin formasaun, no sei fó apoiu ba prosesu dezenvolvimentu sira iha nivel tuir mai.

Formasaun ne’e hetan apoiu husi Prezidénsia Repúblika, liuhusi Gabinete Casa Civil, ho montante 8,500.00 USD

Formasaun ne’e hala’o durante semana ida no fasilita husi formadór internasionál. Total partisipante hamutuk 20, kompostu husi feto 10 no mane 10.

Jornalista: Marito da Costa