F.C Porto Taibesse no Coração F.C Fahe Pontu Hanesan iha Jogu Ikus Primeira Divizaun Liga Timorense

F.C Porto Taibesse vs Coração F.C. Imajen/LFTL

Díli, 20 Jullu (RAFA.TL)- Ekipa F.C Porto Taibesse no Coração F.C fahe pontu hanesan iha jogu ikus Primeira Divizaun Liga Timorense époka 2026 hafoin ekipa rua empata ho score 2-2,

Duelu ekipa rua ne’ebé hala’o iha Estádiu Munisipál Dili, Segunda ne’e, hatudu jogu ida ho balansu no kuaze ho ritmu hanesan hodi asegura vitóri ba ida-idak nia ekipa.

Tama ba minutu neen, Coração F.C halo kedas atake ida ne’ebé ameasa liña defeza F.C Porto Taibesse no hetan oportunidade husi sutu livre ida, maibé bola ne’ebé ezekuta husi José Pinto sei dook husi alvu.

Ho esforsu sira ikus mai Coração F.C konsege marka uluk golu ida iha minutu 11 Jogadór Jeka Monteiro hafoin aproveitaa faillansu ne´ebé guarda-rede adversáriu komete no muda kedas score ba 1-0.

F.C Porto Taibesse kontinua halo esforsu, no tama ba minutu 45+2 jogadór Alexandre Guterres konsege marka golu ida no muda score ba empara 1-1 no score ne´e mantein too intervallu.

Hakat ba segunda parte ekipa rua kontinua hatudu kompromisu no esforsu atu lidera jogu ne’e, nune’e iha minutu 65, Coração F.C lidera hikas jogu ne´e hodi muda score ba 2-1 liu husi golu jogadór Yohanes Jehaman.

Hafoin golu ne´e ekipa rua kontinua lansa kontra atake ba malu no halo mós substituisaun ba jogadór hodi muda tátika, maibé F.C Porto Taibesse kontinua halo mudansa liután no buka atu asegura pontu iha jogu ne’e no halo empata.

Tama ba tempu estra segunda parte nian, F.C Porto Taibesse ne’ebé joga ho intensidade as konsege marka golu ida iha minutu 90+3 liu husi jogadór Daniel Apphia hodi muda score ba 2-2.

Ho empate ne’e, lori ekipa rua ba okupa lima no neen iha tabela klasifikasaun provizoria Primeira Divizaun Liga Timorense époka 2026.

Jornalista: Marito da Costa/Editór: Vito Salvadór