Ezersísiu Anuál CARAT Lansa Ona Hodi Hametin Kooperasaun Bilaterál Timor-Leste ho Estadus Unidus Amérika

Forsa Navál Estadus Unidus (USN) no Forsas Defeza Timor-Leste ka F-FDTL marka inísiu kooperasaun Afloat Readiness and Training (CARAT) Timor-Leste 2025. Imajen/Espesiál

DILI, RAFA.tl— Iha loron 22  fulan-Setembru ne’e, Forsa Navál Estadus Unidus (USN) no Forsas Defeza Timor-Leste  ka F-FDTL marka inísiu kooperasaun Afloat Readiness and Training (CARAT) Timor-Leste 2025 ba dala 14, ho serimónia abertura iha Estádiu Nasionál iha Dili.

“Ami sei hala’o ami-nia ezersísiu CARAT ba dala 14 ho ami-nia parseiru sira iha Timor-Leste,” Kapitaun Matt Scarlett, komodór, Destroyer Squadron (DESRON) 7 no xefe delegasaun EUA nian iha komunikadu imprensa ne’ebé Rafa.tl asesu.

“Atu rezolve hamutuk dezafiu komun sira, ami konsege eleva ami-nia koñesimentu no mellora ami-nia abilidade sira hodi asegura ambiente marítimu ida ne’ebé estável liu iha rejiaun Indo-Pasífiku.”

Patrimóniu hirak Estadus Unidus nian ne’ebé partisipa iha ezersísiu ne’e inklui ró kombate litorál variante Independénsia USS Cincinnati (LCS 20); Poseidon P-8A ida ne’ebé anexa ba Komandante, Forsa Tarefa (CTF) 72; pesoál sira hosi Frota nia Ekipa Seguransa Anti-Terorizmu – Pasífiku (FASTPAC); membru sira hosi EUA nia Banda Frota da-7; no Guarda Kosteira EUA nia ekipa vizita, peskiza no apreensaun (VBSS).

Partisipasaun Timor-oan sei inklui mergulladór sira, tékniku EOD sira, banda F-FDTL, no ekipa médiku ida.

Durante faze iha tasi-ibun, membru militár Timor-oan no Amerikanu nia peritu sira kona-bá asuntu espesializadu sei troka koñesimentu hirak kona-bá tópiku jurídiku, médiku, mergullu no salvamentu, seguransa bá portu, no protesaun ba forsa.

Mariñeiru sira mós sei partisipa iha eventu relasaun komunitária (COMRELs) atu hametin ligasaun entre ema bá ema ne’ebé forma aliserse ba relasaun EUA-Timor-Leste.

“Iha ámbitu defeza, kooperasaun bilaterál tradús ona bá apoiu konsistente bá dezenvolvimentu kapasidade F-FDTL nian liuhosi programa formasaun, asisténsia téknika, no ezersísiu hirak hanesan CARAT,” Xefe Estadu Maiór F-FDTL, Tenente-Jenerál Falur Rate Laek,  hateten.

“Apoiu ida-ne’e folin-boot tebes hodi hari’i forsa defesa ho profisionál ne’ebé iha kapasidade atu asegura seguransa nasionál no kontribui ba estabilidade rejionál.”

CARAT Timor-Leste dezeña atu promove kooperasaun seguransa rejionál, mantein no hametin parseria marítima, no hasa’e interoperabilidade marítima.

Tinan ida-ne’e marka edisaun CARAT ba da-31, série ezersísiu multinasionál ida ne’ebé dezeña atu hasa’e abilidades hosi mariñas hosi Estadus Unidus no parseiru sira hodi opera hamutuk atu hatán ba dezafiu komun sira seguransa marítima nian iha rejiaun Indo-Pasífiku.

Tanba Forsa Navál EUA nia DESRON destakadu iha Sudeste Aziátiku, DESRON 7 serve hanesan komando tátiku no operasionál prinsipál ba ró kombate litorál hirak-ne’ebé destaka rotativamente ba Singapura; funsiona hanesan Komandante, Forsa Tarefa 76 Komandante Kombate iha Tasi; no hari’i parseria sira liuhosi ezersísiu treinamentu sira no engajamentu militár-ba-militár nu’udar ajente ezekutivu hosi Komandante, Grupu Tarefa CARAT.

Frota 7 maka frota númeru boot liu hosi Forsa Navál EUA nian ne’ebé destaca iha oin, no halo interasaun no operasaun rotina ho aliadu no parseiru sira hodi prezerva rejiaun Indo-Pasífiku ida ne’ebé livre no nakloke.

Reportajen Ekipa Rafa.tl