Ezequiel Sanchez Pinto iha Ambisaun Hakarak Lori Estrela Baguia Ba Final Four

Jogadór Ezequiel Sanchez Pinto.

Díli 1 Setembru 2026 (RAFA)- Jogadór Ezequiel Sanchez Pinto, deklara iha ambisaun hakarak lori ekipa AD Estrella Baguia hakat too  Final Four iha kompetisaun Liga Futsal Timor-Leste époka 2026.

Eis kapitaun Coelho F.C ne’ebé agora dadaun hetan kontratu no joga ba AD Estrela Baguia, hateten katak nia objetivu prinsipál iha Liga Futsal Timor-Leste temporada ida-ne’e mak atu haforsa ekipa no ajuda AD Estrela Baguia garante vaga ba Final Four.

Ezequiel hato’o nia ambisaun ne’ebá RAFA iha Kampu Futsal Matadoru, Segunda-ne’e, hodi argumenta katak ekipa sei halo esforsu máximu no prepara an ho di’ak atu bele atinji objetivu ne’e ho companheiru na’in haat ne’ebé foin mai atu reforsa ekipa, iha objetivu ida de’it, mak ajuda Estrela Baguia hetan pozisaun iha Final Four no buka oportunidade atu repete susesu hodi luta ba títulu kampiaun Liga Futsal Timor-Leste.

“Ami na’in-haat mai iha Estrela Baguia ho objetivu ida de’it, hakarak reforsa ekipa atu tama iha Final Four. Hafoin ne’e, ami hakarak luta fali atu hadau títulu Liga Futsal Timor-Leste,” hateten Ezequiel Sanchez Pinto.

Kona-bá desizaun husik Coelho F.C, Ezequiel esplika katak nia desizaun ne’e la iha problema ka obrigasaun ho klubu anterior maibé hakarak simu dezafiu foun no fó kontribuisaun ba Estrela Baguia.

“Kona-bá desizaun retira husi ha’u nia klubu anterior, laiha problema ruma no laiha obrigasaun. Ha’u hakarak deside duni mai atu reforsa Estrela Baguia,” nia tenik.

Ba Ezequiel, Estrela Baguia hanesan ekipa foun ne’ebé foin sae mai ba Primeira Divizaun, no ida-ne’e sai desafio foun ba nia no jogador sira seluk. Maski nune’e, nia asegura katak la iha problema entre nia ho klubu anterior, no nia agora konsentra tomak ba objetivu Estrela Baguia.

Ezequiel ho jogador na’in haat ne’ebé foin tama, agora sei servisu hamutuk hodi hasa’e forsa Estrela Baguia iha kompetisaun no buka lugar ida iha Final Four.

Jogadór na’in-ha’at husi Coelho F.C deside muda ba ekipa promovida AD Estrela Baguia atu aumenta forsa plantel iha kompetisaun Liga Futsal Timor-Leste temporada ida-ne’e mak hanesan eis kapitaun Zaquiel Sanches Pinto, ne’ebé joga iha pozisaun angkor, Ruben Faria nu’udar pivot, Miguel Lay iha pozisaun flank no Fernando Costa nu’udar guarda-redes.

Jornalista: Davilio Valdamir/ Marito Da Costa