Estudante ho Joven Sira Tenke Kria Dame Hodi Kontribui Ba Dezenvolvimentu Nasionál

Prezidente Parlamentu Nasionál, Maria Fernanda Lay. Imajen/Rafa.tl

DILI, RAFA.tl– Prezidente Parlamentu Nasionál (PPN), Maria Fernanda Lay  husu estudante no joven sira nu’udár futuru ba lideransa Timor-Leste tenke kria dame hodi kontribui ba dezenvolvimentu Nasionál.

Notísia Relevante: Diskursu Ofisiál Prezidente Repúblika José Ramos-Horta Nian iha Komemorasaun Tinan-50 Proklamasaun Independénsia

Prezidente Parlamentu Nasionál, Maria Fernanda Lay, ba jornalista sira bainhira partisipa serimónia  loron proklamasaun Independénsia ba dala-50 iha resintu Palásiu Governu, Díli, Sesta (28/11/2025) hateten, joven no estudante sira labele monu ba interese ema seluk nian hodi uza de’it imi, maibé kria dame no unidade ba malu tanba tinan oin progresu barak mak sei lori mai Timor-Leste, maibé depende ba estabilidade iha rai laran.

“Ha’u nia lia menon ba joven sira, labele ema uza ba interese ema seluk nian liu-liu estudante sira futuru líder ba nasaun tanba ne’e kria páz hodi nune’e iha dezenvolvimentu iha Timor. Klaru katak iha tinan oin progresu barak mak sei lori mai, maibé depende ba ita nia estabilidade polítika iha rejiaun no mós polítika iha rai laran,”  Maria Fernanda Lay hateten.

PPN hatutan, Timoroan hotu haré ba oin maibé tenke agradese mós ba gerilleiru sira ne’ebé durante halo funu iha ai-laran to’o ukun rasik an,  balun hetan ona sira nia naran iha, maibé balun laiha naran to’o ohin loron, tenke halo orasaun ba sira nafatin.

“Ita haré ba oin maibé ita tenke agradese ba ita nia gerilleiru sira, ema sivíl, vítima sira ne’ebé mate durante luta iha ai-laran, sira ne’ebé balun hetan sira nia naran iha, sira ne’ebé laiha naran ita halo orasaun hamutuk ho sira,” PPN Maria Fernanda Lay tenik.

Reprezentante povu ne’e parabeniza povu Timor-Leste progresu ba oin depende Timoroan hotu nia hamutuk ema politikamente  tenke hamutuk rekonsilia ba malu, atu nune’e, lori dezenvolvimentu ba povu Timor-Leste.

“Dala ida tan ha’u nia parabéns ba povu Timor-Leste tomak saudasoens ita hotu nian, espera katak ita reza ba oin laiha dezastre naturais iha Timor, para dezenvolvimentu bele la’o,” Nia hateten.

Nia haktuir Prezidente Repúblika José Ramos-Horta nia diskursu ne’ebé husu para atu iha rekonsiliasaun, tanba horseik iha Parlamentu mós iha atividade barak, maibé líder sira bele tur hamutuk, la’ós tenke maibé sira mak líder nasaun nian, sira mak hatene di’ak liu saida ba rai no povu liu-liu ba juventude sira.

Reportajen ekipa Rafa.tl