España Kampiaun Kopa Mundiál 2026 Hafoin Manán Arjentina 1-0

Avansadu Español, Ferran Torres kontribui golu determinasaun ba vitória España nian hodi hetan títulu kampiaun kopa mundiál 2026, Segunda 20 Jullu 2026. Imajen/FIFA

Díli, 20 Jullu 2026 (RAFA.TL)- Ekipa Selesaun Nasionál España (La Furia Roja) kampeaun Kopa Mundiál 2026 hafoin rekolla vitória dramátiku 1-0 hasoru Arjentina iha Estádiu Nova Iorke, Estadus Unidus, Segunda-ne’e.

Iha jogu finál kopa mundiál 2026 ne’e, ekipa España domina jogu hahú hosi primeira parte, hodi kria oportunidade oioin.

Oportunidade di’ak liu sira nian mosu iha minutu dalima bainhira Lamine Yamal besik tau marka golu, maibé nia esforsu ne’e hetan frustrasaun husi esforsu kombinadu husi Lisandro Martinez no Emiliano Martinez.

Arjentina ameasa liuhosi pasajen husi Lionel Messi ba Nico Gonzalez, maibé oportunidade ne’e la konverte.

Jogu parte dahuluk remata la ho golu, no Lisandro Martinez obriga sai tanba lezaun no troka hosi Nicolas Otamendi.

Iha inísiu hosi segunda parte, España presiona kedas defeza Arjentina nian. Minutu ida de’it, Alejandro Baena hetan oportunidade osan-mean ida hafoin kapitaliza iha pasajen ne’ebé la loos hosi Leandro Paredes, maibé nia suta hetan salva hosi Emiliano Martinez.

España nia presaun kontinua. Iha minutu 55, Nicolas Otamendi halo atake krusiál ida hodi hapara oportunidade ne’ebé harii hosi Fabian Ruiz no Mikel Oyarzabal.

Minutu ida liutiha, Gonzalo Montiel halo apuramentu eroiku ida iha baliza nia oin hafoin Dani Olmo halo pasajen ida ne’ebé presiza ba Marc Cucurella.

Oportunidade di’ak liu España nian to’o iha minutu 67’. Yamal halakon defeza arjentinu na’in rua molok haruka kruzamentu ida ne’ebé loos ba Ferran Torres; infelizmente, nia kabesa tama diretamente ba Emiliano Martinez nia liman.

Tama iha minutu 15 ikus, La Furia Roja aumenta sira nia intensidade atake nian. Pedri halo suta ida iha minutu 77, ne’ebé Emiliano salva dala ida tan. Lakleur depois, guarda-rede Aston Villa nian halo tan salvasaun ida ne’ebé importante, hodi hapara esforsu dook ida hosi Pau Cubarsi.

Drama akontese durante tempu estra nian. Iha minutu 90+3, médiu arjentinu Enzo Fernandez simu kartaun mean hafoin atake maka’as hasoru Pau Cubarsi bainhira dezafia bola.

Kartaun mean obriga Arjentina atu remata jogu ho jogadór na’in-10 no hasoru tempu adisionál iha pozisaun ida ne’ebé difisil liu, enkuantu España iha vantajen numérika ida tanba sira buka golu ne’ebé sei manán títulu Kopa Mundiál 2026 nian.

Ekipa rua tenke kontinua ba tempu adisionál hafoin empata 0-0 iha 90 minutu tempu normal nian.

Iha tempu adisionál ne’e, ekipa España kontinua domina bola no lansa atake ba adversáriu arjentina.

Selesaun españól ikusmai halakon impase durante tempu adisionál. Golu ne’ebé hein kleur ona to’o iha minutu 106, lakleur de’it hafoin inísiu períodu dahuluk prolongamentu nian.

Atake ne’e harii hosi parte loos liuhosi Pedro Porro, ne’ebé maka halo kruzamentu ba poste dook. Nico Williams hatudu abilidade individuál ne’ebé exelente hodi mantein bola iha jogu antes haruka bola ba Ferran Torres.

Avansadu Español ne’e lansa suta ida ne’ebé maka’as lahó difikuldade ne’ebé maka monu ba Emiliano nia rede nia kakuluk, hodi fó vantajen ba La Furia Roja ho 1-0.

Vantajen ne’e hasa’e konfiansa España nian bainhira sira kontrola jogu. Iha minutu 113, Ferran hetan fali rede arjentinu nia kotuk hafoin simu bola liuhosi Yamal no halakon Emiliano iha situasaun ida hasoru ida; maibé, golu ne’e la permite hosi árbitru tanba Torres iha pozisaun offside.

Arjentina dudu maka’ás ba golu empata nian iha momentu ikus sira jogu nian. Oportunidade osan-mean ida mosu iha minutu 120+1 bainhira Lionel Messi halo suta kantu ida ne’ebé dirije ba poste besik antes monu ba Giovanni Simeone.

Arjentina la konsege halo empata antes apitu finál lian. España mantein lidera1-0 hodi asegura vitória no reklama títulu Kopa Mundiál 2026 nian.

Ho kampiaun ne´e, ekipa La Furia Roja rekolla troféu daruak Tasa Mundiál nian iha istória, hafoin sira nia trofeu dahuluk iha 2010.

Jornalista: David Gonçalves/Editór: Vito Salvadór