España Elimina Portugál husi Kopa Mundiál 2026 ho Score 1-0

España selebra vitória hafoin manán Portugal ho score 1-0 iha jornada 16 Kopa Mundiál 2026. Imajen/FIFA

Díli, 07 Jullu 2026 (RAFA.TL)- Ekipa selesaun nasionál España asegura fatin ida iha kuartu-finál kopa Mundiál 2026 hafoin elimina nia adversáriu  Portugal ho score 1-0.

Jogu ne’ebé hala’o iha Estádiu Dallas, Estadus Unidus, Tersa (07/07/2026), rezulta vitória España nian hodi lori ekipa La Furia Roja ba kuartu-finál hasoru vensedór entre Estadus Unidus no Béljika. Enkuantu kampaña Portugal nian iha Kopa Mundiál 2026 termina ho jogu ne’e.

Jogu ekipa rua nian mai ho intensidade as no ho ritmu ida lais husi minutu ba minutu. España ameasa iha inísiu minutu daruak nian ho suta dook husi Mikel Oyarzabal, ne’ebé guarda rede Diogo Costa konsege salva.

Portugál hatán liu minutu lima ho atake maka’ás husi João Cancelo ne’ebé navega liu bar. Oyarzabal iha tan oportunidade osan-mean ida hafoin simu pasajen ida hosi Dani Olmo, maibé nia remata iha situasaun ida hasoru ida ho Costa sai dook hosi alvu.

España kontinua presaun. Lamine Yamal obriga salvasaun husi Costa ho suta curling ida, no Alex Baena la konsege kapitaliza rebote tanba guarda-rede portugés nega fali nia. Dani Olmo nia esforsu tuir mai hetan blokeiu husi Joao Cancelo.

Tama ba iha minutu 25, Cancelo halo kruzamentu ho kabesa husi Pedro Neto, hodi obriga salvasaun husi Unai Simon, maibé bola ne’ebé maka Cristiano Ronaldo baku hetan mós husi guarda-rede españól.

Nuno Mendes kuaze tau Portugál iha vantajen ho suta ida ne’ebé maka’ás hafoin suta kantu, maibé bola ne’e kona trave, hodi husik eskoru 0-0 to’o ba intervallu.

Iha segunda parte, ekipa rua ne’e aumenta sira nia intensidade atake nian. Kruzamentu baixu ida hosi Pedro Neto iha minutu 52 halai hosi Ronaldo no João Felix iha baliza españól nia oin.

Ba España, Alex Baena no Lamine Yamal troka malu hodi lansa atake ba baliza Diogo Costa, maibé sira na’in-rua la konsege marka glu.

Portugál mós ameasa ho volei ida husi Bruno Fernandes ne’ebé sei dook husi alvu, enkuantu suta ida husi Dani Olmo hetan blokeiu husi defeza Seleção.

España ikus mai halakon impase iha minutu 91, Ferran Torres halo pasajen badak ida ne’ebé maka remata ho kalma hosi Mikel Merino no golu ne’e sai hanesan golu úniku iha jogu ne’e. España manán 1-0 no avansa ba kuartu-finál.

 Jornalista: David Gonçalves/Editór: Vito Salvadór