Eskósia Rekolla Pontu Tolu Importante iha Primeiru Jogu Kopa Mundiál 2026

Lewis Ferguson ho Wilson Isidor iha jogu entre Eskósia no Haiti iha Kopa Mundiál 2026. Imajen/ Greg M. Cooper

Díli, 14 Juñu 2026 (RAFA.TL)- Eskósia marka pontu tolu iha sira nia jogu dahuluk iha Tasa Mundiál 2026 hafoin halakon Haiti ho score 1-0 liu husi golu úniku John McGinn.

Joga ne’ebé halao iha Estádiu Gillette iha Foxborough, Domingu (14/06/2026), Eskósia halo jogu ida ho presaun maka’ás dezde inísiu, Gannon-Doaks lansa ameasa ida ne’ebé loos ba defeza haitianu.

Iha minutu lima ekipa Haiti halo ameasa dahuluk ba adversáriu liu husi jogadór Jean Jacques nia suta husi dook hodi halo ameasa ida ne’ebé perigu ba  baliza.

Ekipa rua kontinua halo presaun ba malu no ekipa Eskósia hetan vantajen iha minutu 27 liu husi jogadór John McGinn hodi lansa suta ida iha área penalidade nia laran no marka golu ba nia ekipa hodi muda score ba 1-0.

Ekipa Haiti hetan oportunidade osan-mean iha minutu 34  atu halo empata, maibé baliza Eskósia Hanley sei antesipa no bele salva nia rede husi bola.

Haiti la konsege responde to’o intervalu, maibé Eskósia mantein lidera ho score 1-0 to’o tempu intervallu

Tama ba segunda parte, Eskósia kontinua domina atake ba adversáriu Haiti, no ekipa Haiti kontinua luta hela atu sobu defeza ne’ebé maka Andrew Robertson no nia kolega sira prepara.

Iha minutu 73, jogadór McGinn hetan tan oportunidade atu aumenta tan golu ida ba Eskósia, maibé suta ne’ebé jogadór ne’e lansa dook de’it hosi baliza Haiti nian.

Haiti iha oportunidade di’ak hodi hatama golu iha minutu 85, maibé jogadór Pierrot ne’ebé aproveita bola ulun ne’e la konsege kabesada ho di’ak hodi marka golu.

To’o jogu nia termina, Eskósia kontinua lidera jogu ne’e hodi rekolla vitória no ho rezultadu ne’e Eskósia temporariamente lidera grupu C hafoin Maroko no Brazil empata no Rekolla deit pontu ida husi sira nia jogu.

Haiti okupa pozisaun ikus liu iha Grupu C ho pontu zero no sofre golu ida.

Kontinua akompaña no asiste jogu kopa mundiál iha transmisaun direta iha Timor-Leste ho NTV/ETO-Telco

Jornalista: Davilio Valdamir/Editór: Vito Salvadór