Erling Haaland Repatria Brazil ho Score 2-1 iha Kopa Mundiál 2026

Estrela selesaun Noruega, Erling Haaland selebra sira-nia vitória hafoin manán Brazil 2-1 iha jornada 16 Kompa Mundiál, Segunda 06 Jullu 2026. Imajen/REUTERS

Díli, 06 Jullu 2026 (RAFA.TL)- Estrela selesaun Noruega nian, Erling Haaland, repatria selesaun nasionál Brazil iha jogu jornada 16 Kopa Mundiál 2026 ho rezultadu 2-1.

Estrela  selesaun Noruega, Erling Haaland, lori nia nasaun avansa ba Kuartu-Finál Kopa Mundiál 2026 hafoin halakon Brazil ho score 2-1 iha  jogu ne’ebé hala’o iha Estádiu MetLife, East Rutherford, Nova Jersey, EUA, Segunda (06/07/2026).

Golu vitória Noruega ne’ebé marka husi Erling Haaland akontese iha minute  76 no 90, enkuantu Brazil responde ho penalidade ida hosi Jogadór Estrella Neymar iha minutu ikus tempu estra segunda parte nian.

Ekipa rua tun ho ritmu jogu ida diferente. Noruega halo kedas amesa ba ekipa Brazil iha minutu dahuluk tempu hahu, golu Noruega hosi Patrick Berg iha minutu datoluk anula hikas hafoin VAR la permite tanba Alexander Sørloth iha ona pozisaun offside durante preparasaun.

Brazil hetan oportunidade osan-mean hafoin arbitru Ismail Elfath hatudu ba pontu penalti iha minutu 12 hafoin haree filmajen VAR nian hosi atake ida hosi Kristoffer Ajer hasoru Matheus Cunha iha kaixa laran. Maski nune’e, Nyland hatudu komportamentu no antisipasaun maka’as hodi lee diresaun penalidade Bruno Guimaraes nian hodi asegura nia reze husi bola penalti ne´e.

Nyland mós halo salvasaun krusiál rua seluk iha primeira parte, hodi impede oportunidade perigozu sira ne’ebé kria hosi Gabriel Martinelli no Vinicius Junior. Iha parte seluk, kontra-atake sira Noruega nian ne’ebé lidera hosi Haaland no kapitaun Martin Odegaard la konsege halakon guarda-rede Alisson Becker, no ekipa rua ne’e mantein ho score 0-0 too intervallu.

Tama ba Segunda parte, ekipa rua ne’e troka atake sira, maibé impase ne’e persiste. Carlo Ancelotti tenta atu hakotu impase hodi hslo subtituisaun no hatam Endrick hodi troka Matheus Cunha iha minutu 58.

Substituisaun ne’e iha impaktu imediatu, tanba Endrick kria oportunidade ida ne’ebé promisór minutu ida de’it hafoin tama iha kampu hodi kaer metin pasajen ida hosi Vinicius Junior, infelizmente nia atake ne´e sei falla.

Tama ba minutu 79 Erling Haland marka golu ba nia ekipa liu husi bola ulun hafoin aproveita pasajen husi nia kompatriota Andreas Schjelderup hodi muda score ba 1-0.

Ekipa selesaun nasionál Brazil besik atu halo empata minutu rua antes tempu normál remata bainhira suta ida hosi Endrick desvia hosi Ajer no fila ba kantu leten-loos, maibé Nyland dala ida tan hatudu reflexu di’ak tebes hodi halo salvasaun ida ne’ebé maka’ás.

Noruega konsege marka golu daruak liu husi Erling Haland iha minutu 90 hodi muda score ba 2-0. Atraza ho golu rua halo Brazil sai frustradu, no tenta atu halo jogu lais no intensidade as hodi buka atu marka golu, ikus mai Brazil hetan penalidade ida hafoin falta ida hosi Leo Ostigaard, ne’ebé halo falta hasoru Casemiro bainhira halo duelo aéreu ida iha kaixa penalti.

Neymar ne’ebé maka tama hodi troka Martinelli iha minutu 67 hakat ba oin hodi foti suta; nia ho susesu marka golu ida hodi muda score ba 1-2 no too jogu termina Noruega mantein lidera ho score 2-1.

Iha kuartu-finál Noruega sei hasoru entre ekipa selesaun nasionál Méxiku ho Inglaterra.

Jornalista: David Gonçalves/Editór: Vito Salvadór