Empreza Seagull Resort Loke Jogu Online iha RAEOA Ilegál

Logotipu SERVE,i.P

DILI, RAFA.tl– Servisu Rejistrasaun no Verifikasaun Emprezariál, Institutu Públiku  (SERVE,I.P) konsidera atividade  empreza internasionál Seagull Resort iha Rejiaun Administrativu Oé-Cusse Ambeno (RAEOA) ilegál tanba hala’o atividade la tuir rekezitu ne’ebé rejistu.

Notísia Relevante: Kazu Online Scamming iha Otél Oe-Upu, PCIC Hakle’an Investigasaun Buka Hatene Pesoál Membru Governu Ne’ebé iha Interese

Diretór Jerál SERVE, I.P, Fausto Soares Dias, liuhosi konferénsia imprensa iha edifísiu sentrál SERVE, I.P iha Dili, Segunda (06/10/2025), hateten pratika jogu online husi empreza internasionál Seagull Resort husi Malázia kontra regra komersiál no Dekretu-Lei rejistu komersiál, tanba ne’e maka autoridade seguransa sira  iha direitu atu halo intervensaun ka buska ba atividade jogu online ne’ebé maka sira pratika iha Otél Oe-Upu, RAEOA.

Nia relata tuir dadus ne’ebé SERVE, I.P asesu iha tinan 2014 empreza internasionál Seagull Resort husi Malázia hetan legalidade no personalidade juridiku, lei númeru 10/2017 no Dekretu-Lei númeru 1016/20217 ho nia atividade komersiál maka alfaiate, ekipamentu eletróniku no tekstil, tanba ne’e SERVE,I.P  konsidera pratika jogu online ne’ebé empreza internasionál Seagull Resort halo ne’e illegal.

“SERVE, I.P deklara ba públiku katak kompañia ne’ebé halo atividade jogu online iha Oé-Cusse konsidera ilegál, tanba sira-nia atividade la rejista ho lisensa ba jogu online,” Fausto Soares Dias afirma.

SERVER,I.P mós seidauk simu dokumentu ruma husi empreza Seagull Resort husi Malázia tanba ne’e husi parte SERVE.I.P husu ba seguransa sira atu investiga kle’an ba aktu ne’ebé komete husi kompañia refere.

Iha fatin hanesan, supervisor senior, Raul Lanjes Sanches hateten tuir lei sosiedade komersial no dekretu-lei rejistu komersial iha artigu 4 ne’ebé maka ko’alia kona-bá personalidade jurídiku tanba ne’e sira konsidera pratika illegal

“Ami koko ona haree buska tuir ami nia regra normal ne’ebé maka ami buska iha arkivu fisiku ho arkivu eletroniku hanesan Sistema plataforma sitadu ne’e ami la hetan kompañia refere nia naran ne’ebé maka fó sai iha media ne’ebé maka husi aprte ita nia autoridade judisial sira no autoridade seguransa sira ba halo buska iha ne’ebá hatete katak segoul resoul ida ne’e tuir lei SERVER,I.P nia ilegal nia la dauk mai registu hodi hetan personalidade jurídiku,” Raul Lanjes Sanches hateten.

Iha fatin hanesan Xefe unidade rejistu komersial Hélio da Costa hateten desde SERVER,I.P harii iha 2013  to’o agora dadus rejistrasaun kompañia sira atinji ona rihun 77.

Husi dadus rejistu, fahe ba tipu empreza no sosiedade maka hanesan unipessoal, Ening, lda, sosiedade anonima, sukursal internasional no mos empreza publika.

Lista dadus tuir tipu empreza ne’e maka hanesan emprezáriu individual ne’e kuaze 31.537, sosiedade unipesoal prokura limitas maka 27.328, sosiedade prokuras limita ka LDA 7.747, depois sosiedade anonima maka 122, sukursal internasional maka 545, empreza públika ho total 8, ida ne’e maka kompozisaun husi empreza ne’ebé rejistada iha Serve ho total 77.287.

Husi total hirak ne’e sidadaun estranjeiru hamutuk 5.510,sidadaun Timor oan ho total 26.154, restu husi ida ne’e maioria misturasaun entre Timor oan no estranjeiru ho total 758, enkuantu total ema ne’ebé loke kompañia ka empreza sira iha Timor-Leste ho total rihun 70 resin.

Xefe Administrasaun Finansa SERVE,I.P,  Tereza Amaral Soares mós relata orsamentu ba pakote ne’ebé sira simu iha tinan 2025, ho total tokon rua resin, ne’e mak total husi fulan-Janeiru too Fulan-Setembru SERVE, I.P mos  rekolla US$ 4.445,025.

Reportajen ekipa Rafa.tl