Empata ho Kolómbia, Seleção das Quinas Hakat Ba Faze Eliminatória Hanesan Runner-up

Portugal vs Colombia. Imajen/AFP

Díli, 28 Juñu 2026 (RAFA.TL)- Ekipa Selesaun Nasionál Portugal (Seleção das Quinas) hakat ba faze eliminatória hanesam Runner-up hafoin empata ho nia adversáriu Kolómbia ho score 0-0 iha jogu ikus faze apuramntu grupu K nian.

Jogu entre Ekipa Selesaun Nasionál Portugal no Kolómbia ne’ebé hala’o iha Estádiu Miami, Miami Gardens, Florida,  Domingu (28/06/2026), ekipa rua halo jogu kuaze hanesan no barak liu ida-idak halo jogu iha nia área hodi hein oportunidade no lansa atake sira ne’ebé perigu.

Kolómbia hetan oportunidade balun iha jogu ne’e, maibé avansadu sira la konsege konverte ba golu.

Ekipa Seleção das Quinas lansa mós atake liu husi kombinasaun entre Vitinha, Bruno Fernandes no Pedro Neto husi liman-los, maibé sei falla.

Jogadór no kapitaun Kolómbia James Rodrigues no David Luiz mós lansa atake tutuir malu ba adversáriu Portugal, maibé sei falla no ekipa rua obrigadu tenke fahe pontu hanesan too intervallu.

Tama ba segunda parte, ekipa rua mantein ho ritmu ne’ebé iha no Portugal halo kedas subtituisaun ba jogadór sira iha liña klaran no defeza hodi halo jogu ida ho agresivu maibé Kolómbia mantein solidu iha liña kotu nune’e ekipa rua laiha ida mak marka uluk golu.

Kolómbia mós kontinua halo mudansa ba tátika ho substituisaun, maibé laiha golu ruma akontese.

Tama ba minutu 89 Kolómbia konsege marka golu liu husi jogadór Davinson Sanchez,  maibé árbitru anula golu ne’e hafoin jogadór Kolómbiaanu ne’ebé marka golu iha pozisaun offside.

Ho rezultadu ne’ebé iha, Kolómbia hakat ba faze eliminatória hanesan kampiaun grupu K ho pontu hitu husi jogu tolu no Portugal haesan runner-up no RD Kongo avansa mós ba faze eliminatória hanesan terseiru klasifikasaun di’ak liu husi ekipa seluk iha faze apuramentu .

Jornalista: Marito da Costa/Editór: Vito Salvadór