Emmanuel F.C Halakon Coração F.C ho Skor 4-2

Jogadór Emmanuel F.C selebra vitória hafoin halakon nia adversáriu Coração F.C iha Jogu kontinuasaun jornada dahuluk Liga Timorense époka 2026 ho skor 4-2.

Díli, 25 Maiu 2026 (RAFA.TL)– Iha Jogu kontinuasaun jornada dahuluk Liga Timorense époka 2026, ne’ebé hala’o iha Estádiu Munisipál Díli, Domingu (24/05/2026), ekipa Emmanuel F.C susesu rekolla vitória dahuluk hafoin halakon nia adversáriu Coração F.C ho skor 4-2.

Notísia Relevante: Jogu Abertura Liga Timorense Époka 2026, Karketu Díli F.C Rekolla Vitória Da-huluk Kontra As Marca ho Skor 4-2

Ekipa rua hahú jogu ho ritmu ne’ebé ekipa ida-idak iha, iha jogu primeira parte haré katak ekipa Coração F.C hahú kedas domina jogu no lansa kedas atake ba adversáriu Emmanuel F.C no halo presaun barak liután.

Tama ba minutu 20 ba leten, ekipa Coração F.C hahú halo kombinasaun di’ak iha liña klaran no halo atake barak liu husi liña eskerda, ho nune’e, tama ba minutu 38 jogadór avansadu Coração F.C Ofri Halitopo marka golu ida hodi muda skor ba 1-0.

Hafoin golu husi Coração F.C, halo jogadór sira husi ekipa Emmanuel F.C joga iha presaun nia laran no sempre komete erru hodi fó oportunidade barak liu tan ba adversáriu Coração F.C hodi joga ho livre no lansa ameasa barak liutan, maibé to’o primeira parte termina skor mantein ho skor 1-0.

Tama ba Segunda parte, ekipa Coração F.C kontinua domina jogu maibé ekipa Emmanuel F.C hahú halo mudansa ba tátika no rotasaun ba jogadór iha liña defeza eskerda hodi asegura área defeza no buka oportunidade ba halo golu.

Iha  minutu 49, Coração F.C kontinua marka tan golu ida liu husi jogadór Jeca Monteiru hodi muda skor ba 2-0. Ho golu ne’e jogadór sira Coração F.C halo selebrasaun ho euphoria maka’as, maske nune’e ekipa Emmanuel F.C hahú hadi’a liña klaran no hasa’e intensidade jogu hodi marka golu ida iha minutu 52 liu husi jogadór Armando Beandound hodi hamihis skor ba 1-2.

Ho golu ne’e, Emmanuel F.C kontinua halo presaun ba Coração F.C no marka tan golu ida liu husi jogadór Armando Beandound iha minutu 66 hodi halo skor impata 2-2. Hafoin golu ne’e Emmanuel F.C kontinua domina jogu no Coração F.C hahú joga iha presaun nia laran.

Emmanuel F.C hahú hetan ritmu jogu no domina jogu iha liña klaran no halo presaun ba adversáriu Coração F.C no tama ba minutu 80 jogadór Emmanuel F.C John Lawani marka golu ida ba nia ekipa hodi muda skor ba 3-2 no ho golu ne’e halo Coração F.C joga iha kedas presaun no Emmanuel F.C kontinua lansa atake barak ba Coração F.C no tama ba minutu 90 liu husi bola kantu Jogadór Jhon Lawani marka tan golu ida hodi muda skor ba 4-2 no ho golu ne’e mak lori vitória ba ekipa Emmanuel F.C no Coração F.C obrigadu tenke simu derota iha jogu ne’e.

hafoin jogu, treinadór Emmanuel F.C, Gaspar Amaral hatete, vitória ne’e akontese bainhira nia parte halo mudansa ba estratejia jogu iha liña klaran no defeza eskerda.

“Hanesan ha’u sempre dehan ba jogadór sira katak, jogu primeiru ne’e jogu desididu, jogu importante maibé ami mos hatene katak, ami nia preparasaun ne’e mínimu, ami mos hatene katak ami nia adversáriu ne’e di’ak, babak pertama sira halo supreza maibé ha’u dehan ba jogadór sira foku nafatin, ita sei iha minutu 45, ha’u fiar katak ita sei bele halo, tanba sira mos ha’u haré hanesan klaran is laiha, entaun ita tenke muda estratejia hodi domina fali klaran, ne’e mak segunda parte ami tau fali 4-4-2 husik de’it straiker rua iha oin no kombina iha klaran hodi halo mudansa ba jogu”. Hatete Gaspar Amaral.

Aleinde ne’e, Treinadór Coração F.C, Miro Valdo Bento rekoñese iha fallansu to’o hetan derota  maibé treinadór ne’e iha kompromisu ida forte atu hadi’a fali performa ekipa nian liu husi treinamentu hodi bele gaña vitória iha jogu tuir mai.

“Ba Ami Coração F.C ami triste tebes, Ami lidera ona 2-0, Fila-fali ema manán ami 4-2, ida ne’e mak ema dehan futebol, ha’u la fó sala ha’u nia jogadór, ne’e responsabilidade treinadór, ami sei iha fallansu barak, ida ne’e fila-fali ba ami, ami sei hadi’a. Ami hakarak ka lakoi jogu tuir mai, ami hasoru ekipa zigante Karketu, ami tenke buka meius oinsá para bele aguenta”. Hatete Miro Valdo Bento.

Jornalista: Marito da Costa/Editór: Vito Salvadór