Emmanuel F.C – AD SLB Laulara Preparadu Ba Jogu Abertura “Taça da Liga 2025”

Emmanuel F.C no AD SLB Laulara preparadu ba jogu abertura “Taça da Liga FFTL 2025”, 17 Janeiru 2026. Imajen/FFTL

DILI, RAFA.tl– Emmanuel F.C no AD SLB Laulara preparadu ba jogu abertura “Taça da Liga 2025”, no ekipa rua iha ambisaun atu asegura vitória. Mézmu ne’e, iha minutu 90 mak determina, se mak sei rekolla pontu tolu hodi lidera tabela klasifikasaun grupu A.

Notísia relevante: AD SLB Laulara no Karketu Díli F.C iha Esperansa, Nilton Gusmão Halo Mudansa Ba FFTL iha Períodu 2026-2030

Prezidente Emmanuel F.C, Aleixo de Carvalho, ba Rafa.tl iha nia rezidénsia Osindu, Kinta (15/01/2026), hatete, Emmanuel F.C preparadu no sei hatudu jogu ne’ebé di’ak ba adeptu sira durante minutu 90  iha jogu abertura hodi garante vitória.

Ekipa Emmanuel F.C nia preparasaun ho tempu badak, kuaze semana ida de’it no preparasaun la másimu, maibé iha prinsípiu klubu Emmanuel F.C nia preparasaun ba abertura agora ne’e hatudu jogu ne’ebé bele fó satisfaz ba nia adeptu sira, ba mós sosiedade iha territóriu Timor-Leste.

“Ha’u fiar sei manán tanba Emmanuel F.C hanesan klubu, no mézmu AD SLB klubu jigante, treina iha kampu di’ak, Emmanuel F.C nia treinu iha kampu ne’ebé maka la favorável,  maibé ha’u fiar katak Emmanuel sei hatudu jogu, no iha minutu 90 mak ami bele hatudu,” Prezidente Emmanuel F.C, Aleixo de Carvalho hateten.

Prezidente Emmanuel F.C subliña mézmu ho de’it jogadór lokál, maibé Emmanuel F.C iha espíritu no ánimu ne’ebé boot atu rekolla vitória iha jogu dahuluk hodi lidera tabela klasifikasaun grupu A no hadau oportunidade másimu ba faze tuir mai.

Iha sorin seluk Sekretáriu Jerál AD SLB Laulara,  Domingos Cairo afirma, hafoin rona ekipa SLB mós bele joga iha Taça da Liga FFTL, ekipa halo kedas  preparasaun másimu hahú  husi treinadór inklui jogadór sira hodi treinu atu enfrenta jogu sira iha Taça da Liga.

“Ami komesa book aan ona para oinsá kontratu jogadór SLB nian ho ami buka maneira oinsá para bele troka treinadór, tanba ami halo avaliasaun ba ami nia treinadór antigu katak nia labele lori ekipa ne’e atu bele susesu di’ak liután tuir mehi husi prezidente SLB nian. Tanba ne’e, ami preparadu komesa kedas iha fulan-Dezembru 2025, tanba jogadór SLB bele hatete katak desde kedas prinsípiu hamrík,  jogadór sira ne’ebé maka mai hamutuk ho SLB ne’e sira sai tiha hanesan família SLB,”  Domingos Cairo informa.

Sekretáriu Jerál AD SLB Laulara ne’e informa mós katak nia ekipa kontratu mós ho treinadór nasionál Vicente, ne’ebé iha époka sira antes ne’e hamutuk ho Karketu Díli F.C.

Nia afirma, SLB mós sei la tur nonók, katak ba kompete, ba batalla ne’e iha buat rua de’it, iha funu hakiduk ba kotuk tanba inimigu maka’as, iha desportu sei la hakiduk to’o minutu 90 mak sei determina katak se mak sai vensedór iha jogu ida ne’e.

“Ami mós iha esperansa no ambisaun boot, tanba SLB dezde kedas inísiu Liga Amadora ne’e SLB maka sempre abertura, ne’e sempre SLB, ne’ebé iha abertura ida ne’e ami lakoi hatún Prezidente nia oin, ami hakarak lori vitória ida ba Prezidente, atu hatudu katak SLB preparadu, ne’ebe ameasa husi Emmanuel ne’e buat baibain ona ba SLB, tanba SLB hasoru Emmanuel ne’e la’os buat foun ida,” Domingos Cairo tenik.

Iha jogu Taça da Liga FFTL ne’e, ekipa Emmanuel F.C sei reforsa husi jogadór estranjeiru ida no ekipa AD SLB Laulara sei reforsa husi jogadór internasionál na’in-haat, kompostu na’in-rua husi Áfrika, na’in-ida husi Colombia no na’in ida tan husi Indonézia.

Reportajen ekipa Rafa.tl