Embaixadór Portugal iha Díli Elojia Entuziasmu Timoroan iha Jogu Portugal vs Kroásia

Timoroan sira iha Díli selebra vitória Seleção das Quinas hafoin manán nia adversáriu Kroásia 2-1.

Díli, 03 Jullu 2026 (RAFA.TL) – Embaixadór Portugal iha Díli, Duarte Bué Alves, elojia entuziasmu povu Timor-Leste ba ekipa futeból Portugal, molok no antes  jogu Portugal kontra (vs) Kroásia iha Kopa Mundiál 2026.

“Desde há’u mai Timor-Leste, ida-ne’e mak impressiona tebes hau,” deplomata ne’e hateten iha entrevista ho NTV, Sesta (3/07/2026).

“Bainhira iha eventu ruma relasiona ho Portugal, liuliu desde kampeonatu  mundial hahú, entuziasmu povu iha dalan sira atu apoia ekipa Portugal maka’ás tebes.”

Tuir embaixadór, entuziasmu ne’e kontinua nafatin, maski jogu balun realiza iha kalan, oras ne´ebe ema servisu no ema deskansa .

Embaixadór Duarte Bué Alves mós destaka atitude povu Timor-Leste durante jouo Portugal ho Uzbekistaun, ne’ebé realiza iha tempu lutu nasionál ba saudozu eis-Prezidenti Francisco Guterres “Lú-Olo”.

Tuir embaixadór, maski povu haksolok tebes ho futeból, sira respeita lutu nasionál no memória eis-prezidenti Lú-Olo, ne’ebé nia konsidera hanesan atitude ida di’ak tebes.

“Entuziasmu boot, maibé mós respeitu kle’an ba sira nia istória rasik,” nia hatete.

Bainhira husu kona-ba relasaun metin entre Timor-Leste no Portugal, maski distánsia entre nasaun rua to’o kilómetru 14.000, embaixadór admite katak ida-ne’e hanesan paradóxu ida, ne’ebé difísil tebes atu komprende.

Nia esplika katak relasaun ne’e liga ho períodu okupasaun Indonézia entre 1975 no 1999, ne’ebé afeta tebes povu Portugal no sosiedade portuguesa.

Ba Timor-Leste, nia sente rekoñesimentu no agradesimentu boot husi sosiedade timoroan, husi jerasaun hotu, ba apoiu Portugal nian ne’ebé durante ne’e sempre hamutuk ho Timor.

Diplomata ne’e, ne’ebé uluk servisu iha Angola liu tinan sanulu, dehan katak relasaun Portugal ho Timor-Leste diferente husi relasaun ne’ebé nia haree iha nasaun seluk membru CPLP.

“Iha ne’e diferente,” nia dehan, tanba istória Timor-Leste entre 1975 no 1999 halo povu rua iha ligasaun espesiál.

Kona-ba partisipasaun ekipa luzófona tolu — Portugal, Brazil no Cabo Verde — iha Kopa Mundiál tinan ida ne’e, embaixadór konsidera ida ne’e hanesan sinal vital husi sira nia nasaun. Nia akresenta katak membru CPLP sira cada vez marka an liutan iha nível internasionál.

Nia mós destaka kualifikasaun Cabo Verde ba fase 16 avos, ne’ebé mak dala uluk ba ekipa ne’e, no dehan katak Timor-Leste sei apoia “maun alin Afrikanu” sira hasoru Argentina.

“Hanesan ohin ita hotu apoia Portugal, aban ita hotu sei apoia Cabo Verde. La iha dúvida kona-ba ida ne’e,” nia dehan.

Bainhira husu mensajen ida ba povu Timor-Leste ne’ebé apoia ekipa Portugal, embaixadór hahú ho hato´o agradesimentu: “Imi nia apoiu importante tebes, boot no furak tebes. Haree povu barak apoia iha dalan sira halo hau sente impresionadu.”

Nia mos husu atu kontinua iha esperansa husi minutu dahuluk to’o ikus, no lembra katak Portugal iha ekipa ida forte, kompetitivu no hatene di’ak saida mak selesaun ne´e hakarak.

“Hau iha konfiansa boot katak ita sei hetan rezultadu di’ak tebes,” nia konklui, ho esperansa katak Portugal bele tama ba faze tuir mai.

Ekipa Portugal (Seleção das Quinas) avansa ba jornada 16 hafoin rekolla vitória dramatiku kontra Kroásia ho score 2-1, iha estádiu Estádiu Toronto, Sesta (03/07/2026).

Reportajen Ekipa Rafa.tl