Ema Na’in-12 Sei Lori Krús Joven Internasionál husi Aeroportu to’o Igreja Katedrál Dili

Simulasaun hodi prepara atu simu Krús Joven Internasionál ne'ebé sei to'o iha Timor-Leste, Sábadu (23/08/2025). Imajen/Rafa.tl

DILI, RAFA.tl– Timor-oan na’in-12 kompostu hosi nane na’in-neen (6) no feto na’in-neen (6) mak sei lori Krús Joven Internasionál husi Aeroportu Internasionál Prezidente Nicolau Lobato bá to’o iha Igreja Katedrál Parokia Imaculada Conceição, Dili.

Notísia Relevante: Krús Joven Internasionál Vizita Kreda Timor Durante Loron-ualu

Timor-oan sira ne’e, komisaun organizadora prepara ona, hodi simu Krús Joven Internasionál ne’ebé sei mai husi Taiwan ne’ebé tuir oráriu sei to’o iha Aeroportu Internasionál Prezidente Nicolau Lobato, Sábadu (23/08/2025), hale’u tuku 13:00 Otl.

To’o iha Aeroportu internasionál Prezidente Nicolau Lobato, sei simu ho lia dadolin, dansa kultura, ne’ebé aprezenta husi sarani Viqueque no hafoin lao ho prosisaun bá direita Igreja Katedrál Parokia Imaculada Conceição, Dili.

Prezidente Ezekutivu, Komisaun Nasionál Juventude Katólika Timor-Leste (CNJCTL), Pe. Francisco Indra do Nascimento Tei Seran, ba jornalista sira iha Aeroportu Internasionál Prezidente Nicolau Lobato, Sesta (22/08/2025) hateten, sira-nia parte halo simulasaun  ona hodi halo preparasaun ba vizita Krús Joven Internasionál hosi Taiwan, tanba ne’e husu sarani sira nia kontribuisaun  no kolaborasaun hodi hakmatek simu krús Joven ne’e.

“Ita nia objetivu prinsipal halibur malu iha Aerportu Internasionál Prezidente Nicolau Lobato atu halo simulasaun preparasaun bá vizita Krús Joven Internasionál nian ne’ebé sei mai iha vizita Kreda Timor, Sábadu (23/08/2025), oráriu sira hotu,  hahú tuku 13:00 Otl, Krús Joven Internasionál sei to’o mai, sei lao tuir programa ne’ebé iha, ne’ebé iha biban ida ne’e husu nafatin ita hotu nia kolaborasaun oinsá Krús ne’e to’o mai ita mantein nafatin situasaun ida ne’ebé hakmatek,”  Pe. Francisco Indra do Nascimento Tei Seran hateten.

Saserdote ne’e esplika,  lalaok simu Ai-Krús Santu ne’e, ekipa sira husi sinodal no Ministériu Negósiu Estranjeiru no Kooperasaun (MNEK) prepara másimu ona, tanba ne’e husu bá ema hotu-hotu  mantein ho situasaun ne’ebé kalma no hakmatek.

Ekipa sira mós  serbisu maka’ás hamutuk ho seguransa sira halo ona planu oinsá prosesu Krús Joven Internasionál ne’e to’o mai no Krús Joven fila-fali, tan ne’e iha biban ida ne’e mai hamutuk atu haree, atu halo koresaun buat ruma ne’ebe sei sala, hadi’a tiha kedas, nune’e aban ne’e  lao tuir ideia ne’ebé iha ona.

Iha fatin hanesan, Diretora Jerál Portokolu MNEK, Josefina Tilman  hateten, sira nia parte mós simu konvite husi parte igreja atu bele servisu hamutuk hodi halo preparasaun ba simu Krús Joven Internasionál.

“Governu no estadu mós hetan konvite husi Komisaun Juventude Katólika Timor-Leste para mai servisu hamutuk depois ita haree mós preparasaun ne’ebe diak liután, para bele simu ita-nia Krús Joven Internasionál ne’ebé maka mai husi Taiwan. Ita hotu-hotu hatene katak, ita nia Krús Joven ne’e importante tebes bá sarani Timor-Leste, ita Timor maioria Katólika, tanba ne’e hotu-hotu partisipa no ami mai fó asistensia ida ne’ebé másimu para depois eventu ne’e bele susesu,” Josefina Tilman hateten.

Representante MNEK ne’e mós husu ba Timor-oan hotu-hotu tenke koopera ho igreja no estadu, hodi nu’une’e eventu sagrada ida ne’e bele la’o ho susesu.

Iha mós informasaun husi parte komisaun sira katak, Padre na’in-haat husi Taiwan  mak akompaña Krús Joven Internasionál mai Timor-Leste.

Reportajen Ekipa Rafa.tl