Ekuadór Halakon Alemaña 2-1 iha Jogu Finál Grupu E

Ekuadór avansa ba segunda volta hafoin vitória improvável . Imajen/AFP

Díli, 26 Juñu 2026 (RAFA.TL)- Ekipa Selesaun Nasionál Ekuadór asegura fatin ida iha Jornada 32 Kopa Mundiál 2026 nian hafoin halakon Alemaña ho score 2-1 iha jogu ikus grupu E, ne’ebé hala’o iha Estádiu Nova Iorke Nova Jersey, Estadus Unidus, Sesta (26/06/2026).

Alemaña halo jogu ida atrativu no hetan  uluk vantajen hodi lansa atake sira ne’ebé perigu ba adversáriu iha minutu dahuluk. Minutu rua de’it jogu lao, Leroy Sané marka ona golu ida hodi muda score ba 1-0 hafoin aproveita pasajen ida hosi Florian Wirtz no lansa sutu direita ba balizaa adversáriu no guarda rede Ekuadór Hernan Galindez labele salva.

Hafoin golu ne’e, Ekuadór mós hahú halo tranjisaun hadi i lansa mós kontra atake. Tama ba minutu sia (9) jogadór Ekuadór Nilson Angulo lansa suta ida ne’ebé maka’ás hosi liur área penalidade nian hodi bola tama ba baliza Alemaña ne´ebé hein husi Manuel Neuer hodi halo score empata 1-1.

Alemaña kontinua domina jogu no lansa atake sira. Jogadór Felix Nmecha nia ameasa liu husi suta dook iha minutu 14, maibé bola halai sees hosi alvu.

Kai Havertz mós hetan oportunidade osan-mean ho kabesa iha minutu 25, maibé Galindez alerta no asegura baliza Ekuadór nian.  Jogu ho ho score 1-1 mantein to’o intervalu.

Iha inísiu segunda parte, Alemaña iha oportunidade atu hetan penalti hafoin Kai Havertz monu iha kaixa. Maibé, hafoin haré filmajen VAR nian, árbitru deside la fó penalidade.

Ekuadór hafoin ne’e aumenta sira nia intensidade atake nian. Iha minutu 66, Manuel Neuer halo salvasaun ida ne’ebé krusiál, hodi asegura  meia-volei ida hosi Enner Valencia.

Golu vitória Ekuadór nian ikus mai mosu iha minutu 77 liu hosi Gonzalo Plata, ne’ebé aproveita bola kantu  husi Kevin Rodriguez ne’ebé maka dudu bola ba baliza no Plata ho lais hatam bola ba rede adversáriu hodi muda score ba 2-1.

Hafoin golu ne’e, ekipa Alemaña kontinua hasae nia intensidade jogu no domin bola hodi buka atu marka golu empata maibé defeza Ekuadór nian mantein disiplina no halo lutu metin hodi asegura vantajen to’o apitu finál.

Jornalista: David Gonçalves/Editór: Vito Salvadór