Ekipa PNTL Susesu Hakat Ba Final Copa Avó Nana Hafoin Manan Zavia F.C 2-1

Ekipa PNTL selebra vitória hafoin manán nia adversáriu Zavia F.C ho score 2-1 iha Tasa Avó Nana 2026

Díli, 23 Setembru 2026 (RAFA)- Ekipa Polísia Nasionál Timor-Leste (PNTL) susesu hakat ba Final Copa Avá Nana 2026 hafoin halakon ekipa adversáriu Zavia F.C ho score 2-1.

Iha Jogu entre ekipa rua ne’ebé hala’o iha Estádiu Munisipál Díli, Tersa-ne´e, ekipa PNTL tun kedas ho ambisaun boot hodi buka oportundade atu marka golu.

Jogu foin hala’o minutu ida, defeza husi ekipa Zavia F.C komete erru hasoru liña avansadu ekipa PNTL, ho nune’e, arbitu deside penalti ba ekipa PNTL.

Alexander da Cruz ne’ebé mak hetan fiar hodi sai ezekutador ba penalidade konsege aproveita ho di’ak hodi produs  golu hodi lori nia ekipa lidera ho score 1-0.

Ho golu sedu husi ekipa PNTL ne’e, obriga ekipa rua  hasa’e liután ritmu jogu hodi buka oportundade atu produs golu, maibé to’o termina jogu priemeira parte ekipa PNTL mantein lidera ho score 1-0.

Kontinua ba segunda parte tensi jogu komesa manas liután. Ekipa rua lansa kontra atake ba malu, no tama ba iha minutu 58, ekipa Zavia F.C halo barullu liña defeza PNTL ikus mai mosu auto golu hodi halo empata ba score sai 1-1.

Ho score refere ekipa rua joga ho kuidadu hodi buka oportundade atu bele produs golu. Nue’e, tama ba iha minutu 77, Aurio Soares susesu produs golu ida hodi lori ekipa PNTL lidera ho score 2-1 to’o jogu segunda parte termina vitória ba ekipa PNTL.

Husi rezulatadu vitória ne’e lori ekipa PNTL hakat ba Final Copa Avô Nana 2026 no sei hein jogu entre ekipa Laisorulai F.C no Bairo da Paz hodi hadau titulu kampiaun iha jogu final.

Jornalista: Davilio Valdamir/ Marito Da Costa