Ekipa Nasionál Ejiptu Manán Nova Zelándia ho Score 3-1

Ejiptu manán Nova Zelándia ho 3-1 iha jogu 2ª jornada Grupu G. Imajen/ REUTERS

Díli, 22 Juñu 2026 (RAFA.TL)- Ekipa Nasionál Ejiptu halakon Nova Zelándia iha jogu daruak grupu G kopa Mundiál 2026, iha Estádiu BC Place, Vancouver, Segunda (22/06/2026).

Iha jogu ne’e, ekipa Nova Zelándia lidera kedas iha primeira parte liu husi nia jogadór Finn Surman no Ejiptu halo fali cameback hafoin intervallu, hodi marka golu tolu liu husi Mostafa Zico, Mohamed Salah, no Trezeguet.

Jogu ekipa rua nian ne’e nakloke tebes iha minutu 10 dahuluk, no ekipa rua lansa kedas kontra atake ba malu hodi halo jogu ne´e ho intensidade as liutan. Nova Zelándia hetan uluk vantajen hodi muda score ba 1-0 iha minutu 15 liu husi Finn Surman liu husi bola.

Hafoin golu ne´e, Ejiptu lansa kedas ameasa ba Nova Zelándia iha minutu 26, liu husi jogadór Omar Marmoush halo suta ida hosi área penalti nia liur, maibé guarda-rede Max Crocombe salva bola.

Ejiptu domina duni bola ho pasazen sira hodi difikulta adversáriu, maibé ekipa Nova Zelandia mantein ho disiplina hodi mantein score ne´ebé iha too primeira parte termina.

Tama ba segunda parte, Ejiptu lansa kedas atake ba adversáriu hodi halo empate 1-1 iha minutu 58 liu husi  jogadór Mustafa Ziko. Ejiptu kontinua aumenta golu iha minutu 67 liu husi Mohamed Salah hodi muda score ba 2-1.

Nova Zelandi tenta halo empata liu husi esforsu sira maibé sei nafatin falla no Ejiptu kontinu lansa atake liu husi Mohamed Salah no aumenta sira nia golu hodi muda score ba 3-1 iha minutu 82 liu husi Mahmoud Trezeguet liu husi kabesa ida hosi kantu. Score la muda to’o jogu termina no Ejiptu asegura sira nia vitóri dahuluk iha Tasa Mundiál 2026.

Ho rezultadu ida-ne’e lori Ejiptu ba lidrea grupu G ho pontu haat, no Iraun no Béljika tuir ho pontu rua, no Nova Zelándia iha pontu ikus liu hafoin rekolla de’it pontu ida.

Jornalista: David Gonçalves/Editór: Vito Salvadór