Ekipa Basketeból Alligators Halakon Adversáriu Salazar 70-52

Alligators vs Salazar iha Liga Nasionál Basketeból. Imajen/LBN

Díli, 12 Jullu 2026 (RAFA.TL) – Ekipa Basketeból mane Alligators rekolla vitória importante hafoin halakon Salazar iha jogu kontinuasaun Liga Nasionál Basketeból ho rezultadu ikus no dominante durante kuarter hotu-hotu ho pontu 70-52.

Jogu entre ekipa rua ne’e hala’o iha Jináziu Desportu Díli, Domingu-ne’e, ekipa Alligators hahú jogu ho ritmu aas no domina kuarter dahuluk hasoru Salazar ho rezultadu 22-15.

Vitória temporária ne’e la ses husi prestasaun briliante husi Alegreino (71), ne’ebé sai jogadór produtivu liu iha kuarter dahuluk hodi kontribui pontu 12, liu husi shoot pontu tolu dala-rua, no shoot pontu rua dala-tolu.

Salazar tenta responde liu husi Octavio, ne’ebé kontribui pontu neen liu husi shoot pontu rua, dala-tolu. Maske nune’e, esforsu ne’e seidauk sufisiente atu kombate Alligators iha kuarter dahuluk.

Hakat ba kuarter daruak, jogu komesa manas liután. Ekipa rua hatudu defeza metin ho estratéjia man-to-man, la fó espasu ba atu marka pontu liu husi defeza ne’ebé forte husi ekipa rua halo kuarter ida-ne’e remata ho Alligators manán 14-11, hodi aumenta vantajen antes tama intervalu.

Tama ba kuartu datoluk, Salazar tenta fó rezisténsia, maibé Alligators nafatin kontrola jogu no manán fali ho pontu 19-16.

Iha kuartu ikus, Alligators hatudu organizasaun di’ak iha atake no defeza, hodi taka jogu ho score 15-10.

Jornalista: Davilio Valdamir/Editór: Vito Salvadór