Ekipa Basketeból Ai-Leba One Shot Halakon DIT ho Score Fantastiku 126-20

Ai-Leba One Shot vs DIT. Imajen/LNB

Dili, 13 Jullu 2026 (RAFA.TL)– Ai-Leba One Shot hatudu dominasaun boot iha jogu kontinuasaun Liga Nasionál basketeból hafoin halakon adversáriu DIT ho score fantastiku 126-20.

Vitória boot husi Ai-Leba One Shot ne’e la ses husi kontribuisaun importante jogadora Zhilza, Ivania no Judelia.

Jogu entre ekipa rua ne’ebé hala’o iha kampu Basketeból Jináziu Desportu de Díli, Domingu-ne´e, iha kuarter dahuluk, Ai-Leba One Shot hahú jogu ho ritmu aas no domina kedas jogu to’o konsege remata kuarter dahuluk ho score 31-3, ho kontribuisaun importante husi Zhilza ne’ebé produs pontu 12 no Judelia kontribui pontu 10.

Tama ba iha kuarter daruak, Ai-Leba kontinua kontrola jogu. Zhilza kontinua hatudu nia abilidade no talentu hodi produs no aumenta tan nia kontribuisaun ho pontu 10, no Ivania hatama pontu hitu, ho nune’e, Kuarter daruak remata ho score 19-5.

Tama ba kuarter datoluk, Ai-Leba nafatin hatudu forsa iha atake. Zhilza kontinua hatudu performa briliante hodi produz tan pontus 16, tuir Ivania ho pontus 14 no Judelia kontribui pontus 12. Ai-Leba konsege rekoilla pontus 42  iha kuarter ida ne’e, enkuantu DIT konsege produs deit Pontus 5.

Iha kuarter ikus, Zhilza nafatin sai ameasa ba defeza DIT ho aumenta tan pontu 8. Judelia mós kontribui pontu 8, no Ivania produs 7. Ai-Leba taka kuarter ikus ho 34-7 no remata jogu ho vitória epektakulu 126-20.

Iha jogu refere, jogadora na’in-tolu Zhilza, Ivania no Judelia sai xave ba vitória husi Ai-Leba One Shot. Zhilza sai mellora markadór ho pontus 44, tuir Ivania ho pontu 29 no Judelia ho pontus 27.

Jornalista: Davilio Valdemir/Editór: Vito Salvadór