Durante Fulan-Sia, Timoroan 72 Lakon Vida Tanba Asidente Tráfegu

Polísia asegura motór sira ne'ebé laiha dokumentu. Imajen/Rafa.tl

DILI, RAFA.tl– Durante fulan-sia (9), husi Janeiru to’o Setembru, tinan ne’e, Polísia Nasionál Timor-Leste (PNTL), Departamentu Tránzitu Seguransa Rodoviária Nasionál, rejista timoroan na’in-72 lakon sira-nia vida tanba hetan asidente tráfegu ho motór no karreta.

Notísia Relevante: Governu Lansa Operasionalidade ATCS no Sinais Sonorus no Parajen Transporte Públiku iha Dili

Diretór Polísia Tránzitu Seguransa Rodoviária Nasionál, Superintendente Xefe Antoninho Mauluta, Segunda (20/10/2025), informa Departamentu Tránzitu Seguransa Rodoviária Nasionál PNTL rejista kazu asidente tráfegu ne’ebé akontese iha Munisípiu 13 inklui Rejiaun Administrativu Espesiál Oé-Cusse Ambeno (RAEOA), durante fulan-sia (9) ne’e hamutuk 2243 no husi númeru ne’e na’in-72 lakon vida.

“Husi asidente sira ne’ebé maka aas liu hanesan  fatór ema hamutuk 90%, fatór karreta ka veíkulu 5%, fatór Estrada ka dalan 5%, fatór natureza temporariu 0%. Id- ne’e mak Tránzitu nia rekapitulasaun husi relatóriu sira ne’ebé mai husi ita nia munisípiu sira, hahú husi fulan-Janeiru to’o Setembru nian,”  Superintendente Xefe Antoninho Mauluta informa ba Jornalista sira iha Komandu Jerál PNTL, Dili.

Polísia Tránzitu Seguransa Rodoviária hala’o nafatin sensibilizasaun no  formasaun kona-bá regra no lei Tránzitu ba eskola sira, hahú husi nível terseiru siklu to’o universitáriu, atu eduka no konsiensializa públiku uza veíkulu ho responsabilidade.

Kazu asidente tráfiku sira ne’ebé aprezenta ona prosesu  ba iha tribunál hodi halo julgamentu husi fulan-Janeiru to’o Setembru tinan 2025, hamutuk 1.664 no husi kazu sira ne’e 21 iha ona desizaun finál, prosesu iha disputa hamutuk 52, sei iha prosesu laran hamutuk 848 no rezolve família hamutuk 743.

Polísia Tránzitu Seguransa Rodoviária Nasionál kontinua fortifika servisu vizilánsia, iha postu unidade Tránzitu sira,  hodi halo passa revista ba transporte sira ne’ebé la kumpre regra no laiha dokumentu.

PNTL prende mós halo apreensaun ba veíkulu Estadu ka karreta governu hamutuk 71, transporte privadu 13.041, transporte Públiku 1. 085, no prende dokumentu 5.143.

PNTL kontinua alerta ba komunidade sira, liu-liu ba sidadaun sira ne’ebé iha transporte hanesan karreta no motór, atu labele konsumu alkoliku  banhira kondús karreta, no kontrola velosidade nune’e bele evita asidente tráfegu.

Reportajen ekipa Rafa.tl