DNTT ho PNTL Sei Aplika Multa ho Valór US$45.00 ba Loja Sira Ne’ebé Laiha Pesoál Estasionamentu

Loja na'in sira tenke koloka pesoál estasionamentu atu ordena kompradór sira transporte hodi evita engarrafamentu. Imajen/Rafa.tl

DILI, RAFA.tl- Diresaun Nasionál Transporte Terrestre (DNTT) hamutuk ho Polísia Nasionál Timor-Leste (PNTL), Diresaun Tránzitu Seguransa Rodoviária, sei aplika multa ho valór US$45.00 ba Loja sira ne’ebé laiha pesoál estasionamentu.

Notísia Relevante: Maioria Loja Sira iha Díli Koloka Ona Pesoál Estasionamentu

Diretora Nasionál Transporte Terrestre (DNTT), Maria Antonia Vitor da Costa, husu loja na’in sira atu prepara pesoál parajen  ka ofisiál estasionamentu iha loja oin hodi organiza fatin estasionamentu bele fasilita sirkulasaun transporte no prevene engarrafamentu.

“Ita husu ba loja na’in sira atu kumpri sirkulár ne’ebé sirkula tiha ona ba loja na’in sira hotu-hotu iha kapitál Díli, atu nune’e, sira bele organiza parajen, bainhira laiha para fatin, sira bele organiza katak labele para iha ne’ebá, ida ne’e regra ne’ebé ami fó sai tiha ona,” Diretora DNTT, Maria Antonia Vitor da Costa ba jornalista sira iha nia knaar fatin, Balide, Díli, Kinta (26/02/2026).

Diretora ne’e hatutan, objetivu sirkulár ne’e eziji loja na’in sira atu rekruta pesoál estasionamentu hodi organiza parajen iha loja oin sira, tanba pesoál estasionamentu sira ne’e mak tenke organiza transporte sira ne’ebé utiliza husi kompradór sira.

DNTT sei monitoriza loja sira ne’ebé koloka ona pesoál estasionamentu, no sira ne’ebé seidauk iha nafatin fó hanoin hodi rekruta lalais hodi bele organiza fatin ba parajen sira, tanba ne’e fó tempu ba loja na’in sira durante fulan ida tenke aranja ona pesoál estasionamentu.

Iha fatin seluk, Diretór Polísia Tránzitu Seguransa Rodoviáriu Nasionál, Superintendente Xefe Polísia António Mauluta hatete, durante ne’e Tránzitu ho DNTT fó ona formasaun ba loja sira nia pesoál estasionamentu no mós fó avizu tan ba loja na’in sira, nune’e hasai tan sirkulár ne’e ba loja sira presiza kumpri.

“Ba oin ami sei servisu hamutuk atu halo atuasaun iha terrenu, bainhira sira la kumpri  karik, ami sei halo atuasaun prega multa ba sira ida-idak, oras ne’e dau-dauk ita kordena husi parte DNTT ho POLTRANS hodi publika ba loja sira tenke kumpri ida ne’e. Se la kumpri sei fó sansaun,” Superintendente Xefe Polísia  António Mauluta afirma.

Nia  subliña, ba oin sei halo operasaun kunjunta ho DNTT hodi halo operasaun ba loja sira nia fatin estasionamentu, bainhira offisiál parajen la organiza di’ak transporte maka parte tránzitu sei prende prega multa mos ba transporte sira ne’ebé para la tuir riska loja iha loja oin sei prende hodi prega multa.

Durante ne’e Polísia Tránzitu  fó avizu bei-beik ba loja na’in sira, maibé iha loja barak liu-liu iha parte Audian sira hahú organiza ona ba fatin parajen ho di’ak, maibé iha loja balun maka seidauk kumpri, maibé liu husi sirkulár ne’ebé fó sai ona ba públiku ne’e sira tenke kumpri atu nune’e evita engrafamentu ho asidente.

Reportajen ekipa Rafa.tl