Diresaun Servisu Investigasaun Kriminál Halo Inspesaun ba Ró Berlin Nakroma

Diresaun Servisu Investigasaun Kriminál (DSIK) halo inspesaun ba Ró Berlin Nakroma iha Portu Dili, Sesta (12/12/2025). Imajen/Rafa.tl

DILI, RAFA.tl – Polísia Nasionál Timor-Leste (PNTL), liu husi Diresaun Servisu Investigasaun Kriminál (DSIK), Sesta (12/12/2025), halo inspesaun ba Ró Berlin Nakroma ne’ebé atraka iha Portu Dili, hodi haré direta kondisaun Ró Berlin Nakroma ne’ebé antes ne’e halo manutensaun iha Surabaya-Indonézia.

Iha inspesaun ne’ebé la’o durante oras rua, hahú husi tuku 09:00 OTL to’o tuku 11:00 OTL ne’e, ekipa DSIK lidera husi Inspetór Polísia,  José Nunes, akompaña husi kapitaun no tripulante Ró Berlin Nakroma nian, inklui Prezidente Autoridade Portuária Timor-Leste, Institutu Públiku (APORTIL, I.P), hodi  tama ba ró laran atu haré direta sasan sira hanesan mákina, pesa no fatin tur ba pasajeiru sira, kuartu ba pasajeiru sira, fatin ba VIP, odamatan ho fatin sira seluk.

Hafoin akompaña ekipa DSIK halo inspesaun, jornalista sira halo konfirmasaun ho Prezidente APORTIL, José de Oliveira Leong hodi hatene kona-bá kondisaun Ró Berlin Nakroma nian ne’ebé halo hela operasaun ba Ataúro no Oé-Cusse.

Prezidente APORTIL lakohi fó komentáriu no hatete katak, Ró ne’e estragu karik labele la’o.

“Ha’u lakohi ko’alia agora, tanba iha hela prosesu inspesaun nia laran, hotu tiha mak imi mai fali entrevista,” José de Oliveira Leong hateten.

Ró Berlin Nakroma ba halo manutensaun iha Surabaya-Indonézia iha fulan-Outubru tinan 2024, no fila hikas mai Timor-Leste iha fulan-Marsu tinan 2025, no kustu manutensaun ho montante US$ 785.000.

Reportajen ekipa Rafa.tl