Diresaun Inspesaun Jerál no Auditoria UNTL Keixa Reitór João Soares Martins Ba PNTL

Dirijente sira Husi Diresaun Inspesaun Jerál no Auditoria UNTL Keixa Reitór João Soares Martins Ba PNTL, Sesta (14/11/2025). Imajen/Rafa.tl

DILI, RAFA.tl- Dirijente sira husi Diresaun Inspesaun Jerál, Auditoria no Kontrolu Kualidade Universidade Nasionál Timor-Leste (UNTL), Sesta (14/11/2025), halo keixa hasoru Reitór João Soares Martins  ba Diresaun Servisu  Investigasaun Kriminál (DSIK), Polísia Nasionál Timor-Leste (PNTL), tanba deskonfia halo abuzu  podér hodi hatun despaixu taka Diresaun Inspesaun Auditoria Kontrolu Kualidade  Universidade nian.

Pro-Reitór Auditoria Inspesaun Rosalino Gomes ba jornalista sira hafoin submete keixa  iha ba Polísia DSIK,iha Komandu Jerál PNTL, Caicoli, hateten, sira-nia parte nu’udár Pro-Reitór Auditoria no Inspesaun UNTL nian, diresaun ida ne’ebé di’ak tebes no estabelese tuir dekretu Lei Nú. 43, artigo 59° atu halo servisu Auditoria ba iha Orsamentu Jerál Estadu (OJE)  ne’ebé agora dadauk la’o hela.

Nia afirma, durante ne’e servisu iha  Diresaun Inspesaun Auditoria no Kontrolu Kualidade nian ne’e asegura dokumentu importante balun no servisu hotu la’o di’ak hela.

“Auditoria la vale ona iha UNTL, relatóriu no dokumentu sira ne’ebé ami halo durante ne’e auditoria hetan, ne’e iha hela nia fatin. Ami sira ne’e agora la iha tiha ona atu ezonera ema ida rua, la iha buat ida, mas ezonera diresaun tomak, ne’e problema la’ós ona ema, maibé problema ne’e dokumentu sira ne’ebé mak ‘konfidensialidade’ durante ami hetan hela,  rai hela ne’e ida ne’e atu tau ba ne’ebé,” Rosalino Gomes hateten.

Pro-Reitór Auditoria Inspesaun ne’e hatutan, ho Reitór nia desizaun tanba antes ne’e  Polísia Nasionál Timor-Leste (PNTL) ezekuta mandadu hodi  halo buska ne’ebé  prosesu ne’e agora iha hela Ministériu Públiku (MP).

“Ami ta’uk de’it tanba  ba despaixu ne’e kuandu ami nia vida fila ona ba ami nia fatin, la’ós ona iha auditoria dokumentu sira ne’e ami atu fó ba se, pasti lakon ona. Tanba ida ne’e mak ami mai fó hatene Polísia katak haré hodi asegura    dokumentu sira ne’ebé mak auditoria hetan risku barak tebes iha UNTL, ida ne’e mak ami fó hatene,” Nia tenik.

Rosalino Gomes haktuir, Reitór UNTL nia despaixu hodi haruka  taka diresaun ne’e, iha  semana kotuk iha loron  07 fulan-Novembru tinan 2025.

“Auditoria ne’e, ba ami servisu ida ke ba ami risku teb-tebes,  tanba ami ba halo  auditoria detekta  fraude ruma, mosu  buat balun ne’ebé akontese iha estrutura UNTL,” nia informa.

Durante ne’e, Reitór uza nia kompeténsia hodi halo presaun ba funsionáriu sira ne’ebé servisu iha estrutura diresaun balun. Konsidera abuzu poder ida ne’ebé mak Reitór halo, ida ne’e tuir lolós ne’e labele iha, kuandu auditoria inspesaun la iha ona, entaun la iha ona kontrolu iha Universidade. No Reitór taka diresaun auditoria ne’e  la iha koñesimentu.

“Ami agora ne’e, ha’u hanesan dosente, ha’u nia ekipa sira servisu hanesan soe hela ba iha rekursu umanu, mais la hatene atu halo servisu saida, la deklara, ne’e abuzu podér ida, ho ida ne’e mak ami mai fo hatene ba Polísia dokumentu esensiál sira labele lakon, tanba prosesu ne’e iha hela Ministériu Públiku, keta halo evidénsia sira ne’ebé ami hetan ne’e lakon tiha, tanba ami la iha ona fatin ne’ebé mak ami nia ne’e entrega ona, dokumentus mos tenke lakon. Tanba evidénsia ba iha MP balun sai tiha arguidu tiha ona, agora halo oinsa mak bele ba konfere sai sásin ida liu husi saida mak ba, buat ida ne’e la di’ak mai ami,” Nia esplika.

Diresaun Inspesaun Auditoria Kontrolu Kualidade  estabelese iha Universidade UNTL ne’e, iha tinan 2010 to’o ohin loron, ne’ebé funsionáriu sira ne’ebé servisu iha diresaun ne’e hamutuk ema na’in rua, ho  despaixu Reitór  nian hodi taka  dirijente balun muda fali ba iha diresaun rekursu umanu hodi servisu  no balun fila ba hanorin.

Jornalista Rafa.tl tenta halo kedas konfirmasaun ho Reitór UNTL, João Soares Martins iha nia Gabinete, maibé pesoál resepsionista iha gabinete Reitór hateten, Reitór laiha fatin, halo hela viajen ba Munisípiu Bobonaro, hodi vizita estudante UNTL sira ne’ebé halo hela estájiu no prátika iha ne’ebá.

Reportajen ekipa Rafa.tl