Dili Internasionál Trade Expo Hametin Konetividade Setór Privadu Nasionál Atu Kompete iha Merkadu Global

Ministru Komérsiu no Indústria (MCI), Filipus Nino Pereira, hemu KTON Kafé iha Dili Interanasionál Trade Expo, Kinta (28/08/2025). Imajen/Rafa.tl

DILI, RAFA.tl–Dili Internasionál Trade Expo (DITE) ne’ebé realiza husi IX Governu Konstitusionál, liuhosi Ministériu Komérsiu no Indústria (MCI) atu hametin konetividade setór privadu nasionál no hadia relasaun ho setór privadu internasionál hodi kompete iha merkadu globál.

Dili Internasionál Trade Expo ne’ebé hala’o iha Sentru Konvensaun Dili (CCD), durante semana ida, hahú husi loron 28 fulan-Agostu to’o loron 01 fulan-Setembru 2025, partisipa husi emprezáriu oi-oin husi Timor-Leste no mós husi Kambodia, Vietname, Índia, Indonézia, Singapura, Malázia ho mós Xina, inklui Macau.

Ministru Komérsiu no Indústria (MCI), Filipus Nino Pereira, Kinta (28/08/2025), esplika objetivu husi expozisaun ida-ne’e maka atu halo konetividade iha setór privadu iha mikro pekena no media empreza, entre empreza sira Timor-Leste no mós kompañia internasional sira.

Nia afirma, ho expozisaun ida-ne’e mós atu haluan merkadu no sai hanesan plataforma ida bá Timor-Leste atu halo promosaun.

“Ita ko’alia ona kona-bá oinsá maka atu haluan ka haboot merkadu, oinsá maka ita bele kontakta ita-nia emprezáriu sira ne’e, oinsá maka ita loke Timor-Leste ho investimentu boot sira tama mai iha ne’e. Ne’ebé ho expo ida-ne’e, sai hanesan plataforma di’ak ida para ita atu halo promosaun bá ita-nia produtu no promosaun bá potensialidade ekonómiku ne’ebé maka Timor-Leste iha,” Ministru Filipus Nino Pereira hateten.

Nia rekoñese Timor-Leste iha produtu poténsia orgániku barak, liu-liu hanesan kafé, ne’ebe maka iha kualidade internasionál, inklui mós produtu gastronomia sira, no ai-han sira. Tanba ne’e, expo ida ne’e, MCI haran “make it & brand it” ka  “halo ida-ne’e & marka ida-ne’e”.

Governu halo expo ida-ne’e hodi bele buka ona merkadu internasionál atu fó oportunidade bá empreza nasionál sira bele bá kompete mós ho produtu iinternasionál sira no bá futuru bele haboot liután produtu rai-laran ho brand ne’ebé kualifikasaun internasionál.

Iha fatin hanesan Prezidente Kámara Komersiu no Industria Timor-Leste (CCI-TL), Jorge Serrano hateten  expo ida-ne’e atu dezenvolve liután produtu sira iha rai-laran, nune’e husu bá emprezáriu Timoroan sira atu hahú hanoin bá hadia kualidade iha produsaun no hasa’e kuantidade produsaun hodi bele kompete iha merkadu internasionál.

“Ita presiza maka sertifikasaun prova sira, sertifikasaun kualidade, sertifikasaun orijen sira, para depois ita bele tau produtu sira ne’e iha merkadu internasionál. Ida-ne’e, ha’u hanoin dalan diak ida, tanba ne’e maka ha’u agradese Primeiru-Ministru no IX Governu Konstitusionál  bá realizasaun eventu id- ne’e,” Jorge Serrano, xefe ezekutivu Grupu Média Nasionál ne’e hateten.

Nia  subliña, partisipasaun iha feira ida-ne’e diak tebes tanba mai mós husi emprezáriu nasionál sira ne’ebé ho produtu rasik no ema sei koñese liután produtu sira Timor nian. Nune’e, bele atrai ema barak mai vizita Timor-Leste hodi bele investe iha Tinor-Leste no bele promove Timor-Leste nia kultura no turizmu sira.

Iha sorin seluk, reprezentante industria  KTON Kafé, Aleixo da Costa hateten orgullu ho eventu Dili Internasionál Trade Expo (DITE), tanba bele lori produtu kafé orgániku Timor  nian mai halo promosaun.

Husi empreza KTON  kafé orgániku Timor no naturál. Ami orgullu tebes partisipa iha expo ida-ne’e, tanba bele mós  promove ita-nia produtu hanesan Timoroan nian rasik. KTON hanesan produtu Timor ne’ebé maka husi Ermera, ninia fatin produsaun maka iha  Tokoluli, Gleno, Munisípiu Ermera ho  produsaun kafé ne’ebé maka husi tipu oi-oin, husi grama 12 to’o kilo ida.

Empreza KTON ne’ebé maioria absorve traballadór Timoroan  husu bá governu atu bele tau matan ba produsaun sira ne’ebe inísia husi Timoroan sira hodi kontínua kontrola produsaun sira husi rai-liur, atu nune’e, produtu Timoroan nian mós bele kompete iha nivel internasionál.

Iha ámbitu expozisau ne’e mós emprezáriu nasionál Timoroan sira asina nota intendimentu, ho emprezáriu internasionál sira, hodi halo esportasaun bá produtu nasionál sira bá iha merkadu internasionál.

Produtu husi Timor-Leste hamutuk 157 maka aprezenta ka halo promosaun iha expo ne’e, no produtu 93 husi empreza internasionál ne’ebé maka partispa mos iha Dili internasional trade expo ne’e.

Reportajen ekipa Rafa.tl