Dezeñu Finál Ba Reabilitasaun Estádiu Munisipál Díli Prontu Ona

Kondisaun atuál Estádiu Munisipál Díli.

Díli, 23 Abríl 2026 (RAFA.tl)–Prezidente Federasaun Futeból Timor-Leste (FFTL), Nilton Telmo Gusmão dos Santos, informa, dezeñu finál ba reabilitasaun Estádiu Munisipál Díli prontu ona no tempu badak sei halo reabilitasaun tuir padraun FTTL.

Notísia Relevante: Prezidente FFTL Promete Harii Kampu Futeból Dignu no Reabilita Estádiu Díli

Ba jornalista sira iha salaun enkontru Ministériu Juventude Desportu Arte no Kultura (MJDAK), Kinta (23/04/2026), Prezidente FFTL, Nilton Telmo Gusmão dos Santos,  hatete, reabilitasaun Estádiu Díli hetan ona konsultóriu ida ne’ebé halo levantamentu no iha ona dezeñu finál ne’ebé aprezenta ona ba FIFA iha Kuala Lumpur. Nune’e, iha tempu badak sei lansa konkursu hodi hahú prosesu reabilitasaun.

“Ita sei lansa konkursu atu bele hahú hala’o reabilitasaun, tanba ne’e mak kompetisaun futeból, ita seidauk bele halo iha kampu Estádiu Díli tanba iha ona prosesu ida atu hahú nia reabilitasaun,” Nilton hateten.

Prezidente FFTL ne’e hatutan, konkursu ne’e sei halo iha rai laran, atu nune’e,  fó benefísiu direta ba setór privadu nasionál sira no FIFA konkorda ho planu ne’ebé Federasaun iha katak konkursu ba reabilitasaun Estádiu Munisipál Díli halo iha rai-0laran no fó prioridade ba Empreza Nasionál sira.

“Agora tempu ne’e mak ita hein de’it FIFA tanba ita propoin ba FIFA atu konkursu ne’e halo iha rai laran, labele halo iha li’ur, tanba  hakarak obra ida ne’e mós  bele iha  impaktu ekonómiku, ba  ita-nia setór privadu sira iha ita nia rain, tanba ne’e mak FIFA mós konkorda ona ho ita nia ideia katak konkursu ne’e halo  iha rai laran, depois empreza sira bele hahú halo  reabilitasaun ba ita-nia Estádiu,” Nilton Gusmão esplika.

Tuir kalendáriu ne’ebé FFTL iha katak obra ba reabilitasaun ne’e sei hahú iha fulan-Agusto no projetu ne’e sei fahe ba parte rua; reabilitasaun ba tuur fatin (bankada/ tribun) no ba du’ut (Relvadu), no agora nia relvadu ka nia du’ut ne’e sei hahú iha tempu badak, tanba ida ne’e projetu separadu ida, ida ne’e tenke hahú uluk para fó tempu hodi du’ut sira ne’e bele moris di’ak fali no tenke iha sistema irigasaun  ne’ebé di’ak atu bele mantein no rega  du’ut sira ne’e atu  du’ut sira ne’e labele maran iha tempu bai-loron.

Jornalista: Marito da Costa/Editór: Vito Salvadór