Deskonfia Na’ok Motór 18, PNTL Aileu-Ermera Asegura Joven Na’in-hitu

Polísia asegura hela motór sira ne'ebé na'ok no la iha dokumentu komprovadu. Imajen/Média PNTL

DILI, RAFA.tl- Polísia Nasionál Timor-Leste (PNTL) Munisípiu Aileu ho Ermera, liuhosi Diresaun Tránzitu Seguransa Rodaviáriu halo pasa revista no  identifika joven na’in-hitu ne’ebé deskonfia na’ok motór unidade 18.

“Suspeitu na’in-hitu ne’ebé ami asegura prosesu la’o hela no suspeitu balun ami sei akompaña hela sira no ami sei buka tuir balun ne’ebé ami kaer konsidera komete fraglante delitu, ami prosesa tuir aktu ne’ebé sira komete,” Portavós PNTL, Superintendente Polísia João Belo dos Reis ba jornalista sira iha Kuartél Jerál PNTL, Dili, Tersa (14/10/2025).

Superintendente Polísia João Belo dos Reis hatutan, durante ne’e  motór barak lakon iha kapitál Dili, ne’ebé Polísia Tránzitu Seguransa Rodaviária  aproveita pasa revista ba peregrinu sira  ne’ebé utiliza motór hodi tuir misa Loron Na’in Feto iha Ramelau Munisípiu Ainaro.

Nia informa, iha semana kotuk rona informasaun husi komunidade balun katak peregrinu sira ne’ebé tuir misa iha loron Na’in Feto Ramelau nian, balun uza motór ne’ebé sira na’ok iha kapitál Díli, liu-liu iha bairru, iha loja no mós iha kampus sira.

“Ami simu tiha  informasaun,  ami koordena kedas ho PNTL Munisípiu Aileu no Ermera atu halo pasa revista, no iha pasa revista ne’e PNTL halo identifikasaun ba joven na’in-hitu, no môs sei buka tuir suspeitu seluk  ne’ebé involve iha na’ok ne’e, no evidénsia motór ne’e asegura ona iha Komandu PNTL Munisípiu Aileu no Ermera,” Nia informa.

Superintendente Polísia João Belo dos Reis, husu ba sidadaun sira ne’ebé motór lakon atu hakat ba iha Komandu PNTL Munisípiu Aileu no Ermera hodi bele haré.

Reportajen Ekipa Rafa.tl