Deskonfia Kompañia RAIMAKMOR Bosok, Vítima 51 Hato’o Keixa Ba Polísia

Abitante na'in-51 halo keixa ba Polísia Eskuadra Vera-Cruz hasoru kompañia RAIMAKMOR, Tersa (15/12/2025). Imajen/Rafa.tl

DILI, RAFA.tl – Abitante na’in-51 hato’o keixa ba Polísia Eskuadra Vera-Cruz hasoru kompañia RAIMAKMOR tanba  sira konsidera RAIMAKMOR bosok sira hatama osan ho valor US$100.00 kada pesoál hodi bele hetan kréditu hahú husi US$500.00 too $100,000.00, maibé to’o agora la realiza, no vítima sira nia osan to’o agora kompañia la devolve.

Hafoin simu keixa husi vítima sira, Polísia Eskuadra Vera-Cruz foti kedas medida hodi buka tuir nain ba kompañia RAIMAKMOR, maibé laiha fatin tanba desvia husi responsabilidade, nune’e Vise-Diretór husi kompañia RAIMAKMOR, Martinho de Sá mak ba prienxe deklarasaun iha Polísia, hodi halo akordu atu reembolso vítima sira nia osan iha tinan foun 2026.

Iha deklarasaun, Vise-Diretór kompañia RAIMAKMOR, Martinho de Sá deklara no iha akordu ho Polísia Eskuadra Vera-Cruz katak sei selu fila-fali vítima sira nia osan.

“Maluk sira ne’ebé la satisfas ona ho ita nia programa ne’e maka ohin ami halo kompromisu iha laran, no mós iha Sesta kotuk mai halo audiénsia ho parte Polísia sira katak, se mak lakohi duni ona ho programa ida ne’e bele rejigna-an, maibé ita tau ba iha loron 26 fulan-Janeiru mak rezolve, no  maluk na’in hira ne’ebé mak hakarak sai husi kompañia ida ne’e bele sai. Se liu  husi dia 26 mak ami la atinji husi promesa ne’ebé ita halo hamutuk ho parte Polísia sira, bele levanta problema ne’e ba iha Tribunál hodi la’o tuir prosesu ne’ebé mak iha,” Martinho de Sá hateten ba vítima sira iha resintu Eskuadra Polísia Vera-Cruz, Tersa (16/12/2025).

Vítima, Francisco da Silva, husi Munisípiu Ermera husu kompañia RAIMAKMOR atu fó fila-fali sira nia osan, tanba ho kompañia nia  promesa sira hatama osan US$100 atu hetan fali jurus husi kompañia ho valór US$1000.00.

“Kompañia RAIMAKMOR, Lda, Micro Finansa Popular holding Group, agora nia lori nia ekipa  konsege to’o iha Munisípiu Ermera, hodi akumula ami tomak tuir, tanba nia programa dehan atu haburas ekonomia povu kbiit laek  sira, depois fó kréditu laiha funan, to’o ikus ami sai vítima tanba prosesu kréditu la konsege hala’o, depois osan ne’ebé mak investe iha Munisípiu Ermera ho montante boot, maibé to’o agora iha de’it US$6000.00. Fó asesu kréditu ba ema na’in neen, ne’ebé ami deskonfia ida ne’e utiliza fila-fali ami nia osan rasik ne’ebé ami investe iha kompañia refere. Ne’ebé durante ami Ermera oan kada ema hatama US$100.00 ne’ebé osan ami hatama ne’e ho montante US$31,000.00 ne’ebé oras ne’e depozita ona iha kompañia refere,” Francisco da Silva hateten.

Nia hatutan, bainhira vítima sira husi Munisípiu Ermera hatama osan husi fulan-Marsu to’o  kompañia na’in promete atu fó kréditu, maibé  to’o fulan-Dezembru laiha solusaun ida.

Vítima ne’e afirma sira nafatin ejize atu kompañia reembolsu fali osan ne’ebé durante ne’e sira hatama. Bainhira la tuir akordu ne’ebé halo ona iha Polísia ne’e sei lori kazu ne’e ba Ministériu Públiku hodi prosesa tuir lei.

Tuir Informasaun ne’ebé Rafa.tl rekolla  husi vítima sira katak molok atu sai membru tenke rejistu ho osan US$35.00 depois atu hetan kréditu tuir prosedimentu empreza nian ema ida hatama US$100.00, no kompañia fó kréditu US$1000.00, laiha funan. Bainhira hatama US$500.00 hetan kréditu US$5000.00, no hatama US$1000.00 sei hetan kréditu US$100.000.00.

Vítima 51  ne’ebé keixa kompañia ba iha postu Polísia Eskuadra Vera-Cruz ne’e maioria husi Munisípiu Ermera, Díli no Oé-Cusse, ne’ebé  sira nia osan durante ne’e hatama iha kompañia ne’e kuaze besik miliaun ida ona, maibé kompañia  seidauk  fó kréditu ba sira, ne’ebé la inklui ho vítima sira seluk husi Munisípiu sira seluk.

Hafoin rona deklarasaun husi parte kompañia no vítima sira, Xefe Investigasaun Polísia Eskuadra Vera-Cruz, Inspetór Asistente Polísia Joel Pereira fó hanoin ba vítima sira atu fó tempu ba kompañia na’in tanba sira halo ona promesa iha fulan-Janeiru tinan 2026 sei rezolve no reembolsa vítima sira nia osan.

Reportajen Ekipa Rafa.tl