Daichi Kamada Salva Japaun Husi Derrota no Fahe Pontu Hanesan ho Olanda iha Grupu F

Jogu entre Japaun ho Olanda termina ho rezultadu fahe pontu hanesan ho score 2-2. Imajen/FIFA

Díli 15 Juñu 2026 (RAFA.TL)- Jogu kontinuasaun Kopa Mundiál  2026, jogadór Japaun Daichi Kamada salva nia nasaun husi derrota no fahe pontu hanesan ho Olanda iha grupu F hafoin ekipa rua mantein ho score 2-2 to’o jogu termina.

Jogu entre ekipa rua ne’ebé hala’o iha Estádiu Dallas, Segunda (15/06/2026), ekipa rua  lansa golu troka malu iha segunda parte hafoin primeira parte termina ho score 0-0.

Olanda marka uluk golu  liuhosi Virgil van Dijk nia kabesa iha minutu 51, maibé Japaun halo empata liuhosi suta hosi Keito Nakamura iha minutu 57.

Olanda kontinua marka segunda golu liuhosi Crysencio Summerville nia suta iha minutu 64, maibé Daichi Kamada nia kabesa úniku asegura Japaun husi derrota no halo empata 2-2.

Ho rezultadu ne’e, Japaun mantein pozisaun dahuluk ho pontu ida, liu fali Olanda, ne’ebé hetan kartaun kinor tolu tanba fair play.

Olanda ameasa husi dezde minutu tolu, maibé suta Donyell Malen salva husi guarda rede Japaun Zion Suzuki.

Japaun halo kontra atake iha minutu 28, maibé Hiroki Ito nia suta sei liu de’it husi baliza Bart Verbruggen nia rede leten.

Malen besik atu marka golu hosi kantu iha minutu 34, maibé nia kabesa hetan salva hosi Suzuki. Olandés sira hetan fali kontrolu ba bola ne’ebé namkari no lansa tan kruzamentu ida, maibé dala ida-ne’e Micky van de Ven nia kabesa nakfera liu.

Olandés nia tentativa tuir mai liu hosi suta Cody Gakpo nian iha minutu 36, maibé bola la konsege hetan alvu. Japaun la husik. Keito Nakamura iha oportunidade iha minutu 43, maibé nia suta husi área penalidade laran sai ba liur. Ayase Ueda mós lakon alvu iha minutu 45.

Hafoin primeira parte laiha golu, ikus mai Olanda halakon impase iha segunda parte, iha minutu 51. Hahú hosi situasaun bola mate, Virgil van Dijk kabesa kruzamentu Ryan Gravenberch nian ba iha kantu loos, hodi halo Suzuki labele hapara.

Maibé, vantajen ne’e la dura kleur, tanba Japaun hatán kedas iha minutu 57, suta Nakamura nian, hafoin simu pasajen badak ida hosi Takefusa Kubo, desvia hosi Jan Paul van Hecke no navega ho la esforsu ba kantu karuk baliza olandeza nian, hodi halakon Verbruggen.

Olanda hetan fali vantajen 2-1 iha minutu 64. Gravenberch konsege empata liña kotuk Japaun nian, no bola pasa ba Crysencio Summerville, ne’ebé hetan espasu iha sorin-loos. Ho suta ida ne’ebé maka’as iha kantu kraik karuk, Summerville halakon Suzuki nia baliza.

Ikus mai Japaun halo empata iha minutu 89. Husi suta kantu, Koki Ogawa nia kabesa ne’ebé maka’as kona Daichi Kamada nia ulun, hodi halo Verbruggen hakfodak.

Maski guarda-redes salva, bola ne’e tama ba nia rede rasik no score mantein 2-2 to’o apitu ikus nian.

Jornalista: Davilio Valdemi/Editór: Vito Salvadór