CAC Hein Ezaminasaun husi PCIC Atu Kontínua Investigasaun Bá Jerente Timor GAP-E.P ho Inisiál AC

CAC halo buska no apreensaun ba Jerente ida husi Timor GAP-Empreza Públika (Timor GAP-E.P) ho inisiál AC iha nia rezidénsia privadu no asegura mós dokumentu ho karreta ptivadu ida, Kuarta (17/12/2025). Imajen/Rafa.tl

DILI, RAFA.tl – Komisaun Anti-Korupsaun (CAC, sigla portugés) sei hein prosesu ezaminasaun ba evidénsia husi Polísia Sientífiku Investigasaun Kriminál (PCIC, sigla portugés)  molok hakle’an  investigasaun ba Jerente Timor GAP-E.P ho inisiál AC.

Notísia Relevante: Breaking News: CAC Halo Buska no Apreensaun Ba Jerente Timor GAP, E.P ho Inisiál AC

Diretór Investigasaun Kriminál CAC, José Verdial, ba jornalista sira iha edifísiu CAC, Farol, Díli, Kuarta (21/01/2026) hateten, kona-bá prosesu kazu Jerente Timor GAP-E.P, agora iha hela prosesu nia laran ne’ebé hein rezultadu ezaminasaun  halo husi PCIC ba telefone no bainhira haruka fila ona mai iha CAC hafoin kontinua prosesu tuir mai.

“Ba Jerente Timor GAP-E.P ho inisiál AC nia prosesu la’o hela, ami sei hein hela ezaminasaun ba iha telefónika, tanba  CAC rasik la iha ekipamentu no tékniku própriu ba halo ezaminasaun ba telefónika, entaun servisu hamutuk ho PCIC ho orientasaun Ministériu Públiku nian para agora parte PCIC nian mak halo hela ezaminasaun ba telefónika. Ami sei hein, orsida, rezultadu ezaminasaun hotu ona, depois haruka mai mak ami kontinua fila-fali ninia prosesu,” Diretór Investigasaun Kriminál CAC, José Verdial haktuir.

Diretór Investigasaun Kriminál CAC ne’e klarifika katak, kona-bá evidénsia sira ne’ebé CAC rekolla iha jerente Timor GAP-E.P ho  inisiál AC nia rezidénsia ne’e submete hotu ona ba iha Ministériu Públiku.

Komisaun Anti-Korrupsaun (CAC, sigla portugés), Kuarta (17/12/2025), hale’u tuku 07:30 Otl halo buska no apreensaun ba Jerente ida husi Timor GAP-Empreza Públika (Timor GAP-E.P) ho inisiál AC iha nia rezidénsia privadu iha Aldeia 30 de Agostu, Suku Comoro, Postu Administrativu Dom Aleixo, Munisípiu Díli.

Órgaun Polisiál CAC halo buska no apreensaun ba Jerente Timor GAP-E.P ho inisiál AC ne’e ho baze mandadu husi Ministériu Públiku, tanba deskonfia komete kríme abuzu poder no partisipasaun ekonómiku.

Iha buska no apreensaun iha rezidénsia AC nian ne’ebé la’o durante oras rua ne’e, ekipa CAC rekolla evidénsia sira hanesan, dokumentu sira no tau iha kaixa rua no asegura ho karreta privadu ida.

Hafoin rekolla evidénsia sira, ekipa CAC transporta kedas Jerente inisiál AC ho evidénsia sira ba iha Edifísiu CAC iha Farol iha tuku 09:30 Otl hodi halo prosesu identifikasaun no investigasaun.

Bainhira to’o iha Edifísiu CAC, ekipa investigadór CAC nian diretamente lori Jerente Timor GAP-E.P ne’e ba iha sala investigasaun nian hodi halo inkéritu no identifikasaun ba dokumentu no evidénsia sira ne’ebé rekolla iha terrenu.

Reportajen ekipa Rafa.tl