Cabo Verde Halo Surpreza no Avansa Ba Faze Eliminatória Kopa Mundiál 2026

Selesaun nasionál Cabo Verde selebra sira-nia vitória iha kualifikasaun Copa Mundiál 2026. Imajen/Repro

Díli, 27 Juñu 2026 (RAFA.TL)- Ekipa selesaun nasionál Cabo Verde konsege halo istória foun no supreza iha sira nia jogu Kopa Mundiál dahuluk hafoin iha faze apuramentu grupu H nunka sofre derrota no hakat ba faze eliminatória ho susesu.

Tikete ba faze eliminatóriu ne’e, ekipa nasional Cabo Verde hetan hafoin iha jogu ikus ho Arábia Saudita empata ho score 0-0 iha Estádiu Houston, Texas, Estadus Unidus, Sábadu (27/06/2026).

Hafoin jogu ida ho intensidade as hasoru Arábia Saudita, Cabo Verde avansa ho susesu ba faze eliminatória Kopa Mundiál 2026 hafoin rekolla pontu tolu husi jogu tolu ne’ebé ho rezultadu empata hasoru España, Uruguai no Arárbia Saudita.

Iha jogu, ekipa Arábia Saudita iha esforsu atu rekolla billete ida ba faze apuramentu nian, maibé durante jogu ekipa rua iha forsa hanesan no kuaze la konverte bola oportunidade sira ne’ebé iha sai ba golu nune’e ekipa rua mantein ho score 0-0.

Ekipa Arábia Saudita no Cabo Verde laiha ida mak foti risku sira ne’ebé la nesesáriu, hodi halo deit jogu ne’ebé barak liu iha meiu-kampu hodi bola oportunidade no lansa kontra atake ba malu.

Ekipa Cabo Verde hahú foti inisiativa, maski nasaun afrikanu laiha vantajen iha oin hodi lansa ameasa ne’ebé nesesáriu ba defeza Arábia Saudita nian ne’ebé dalaruma falla antesipa bola ho di’ak.

Arábia Saudita la kria kuaze buat ida iha termu sira atake nian. Aleinde kabesa ida hosi Mohammed Kanno ne’ebé la konsege marka golu ba baliza Cabo Verde Vozinha. Ekipa rua mantein ho score 0-0 too intrevallu.

Tama ba segunda parte, Cabo Verde sai nafatin hanesan ekipa ne’ebé maka dominante liu iha jogu ne’e.

Iha minutu 65, jogadór Cavoi Verde, Laros Duarte hetan oportunidade osan-mean hodi marka golu, maibé jogadór ne’ebé moris iha Rotterdam la konsege marka golu ba guarda rede Arábia Saudita Mohammed Al-Owais iha situasaun ida hasoru ida.

Maski iha tempu parajen nian, Cabo Verde estraga oportunidade ida seluk ne’ebé klaru, maski ikus mai ladún importante.

To’o jogu termina, ekipa rua mantein ho score 0-0. Ho rezultadu ne’e, Cabo Verde marka istória hodi hakat ba faze eliminatóriu Kopa Mundiál 2026, hafoin iha jogu seluk Uruguai lakon hasoru España.

 Jornalista: David Gonçalves/Editór: Vito Salvadór