Breaking News: DNTM Konfirma Ró Woodside Nian ho Tipu Plataforma Mina Mak Fundeado iha Tasi-Laran Illa Ataúro

Ró empreza Woodside nian daudaun ne'e fundeado hela iha tasi-laran Illa Ataúro nian. Imajen/Rafa.tl

DILI, RAFA.tl– Diresaun Nasionál Transporte Marítima (DNTM) konfirma katak ró kompañia Woodside nian ho tipu Plataforma Mina mak daudaun ne’e fundeado  ka para hela iha tasi-laran no la halo atividade besik Illa Ataúro.

Nota informativu husi DNTM ne’ebé Rafa.tl asesu, Tersa (09/12/2025), haktuir katak ró kompañia internasionál Woodside nian ho tipu plataforma mina ne’e sai hosi Xina ba Singapura no mai Dili atu liubá Perth- Austrália ho objetivu to’o iha Dili hodi halo crew changes ka mudansa tripulasaun no foti apoiu lojistika.

Crew changes ka mudansa tripulasaun iha mundu ró nian ne’e refere ba prosesu atu troka tripulasaun ró nian, ne’ebé envolve troka membru tripulasaun ida ne’ebé nia servisu remata ona ho membru tripulasaun foun. Prosesu ida-ne’e normalmente akontese iha portu ka iha tasi laran, depende ba nesesidade no polítika sira hosi kompañia ró nian.

Ró Plataforma Mina nian husi empresa Woodside ne’e dada hosi ró rebokador haat (4) no ida akompaña. Ajénsia ne’ebé fasilita ba atividade ne’e maka ajénsia Australian National Line (ANL).

DNTM informa ona ba autoridade competente sira, hanesan Unidade Polísia Maritíma (UPM) ho arte guvernu nian, liuliu DNTM sei hein oráriu ba inspesaun ró hirak ne’e.

Reportajen Ekipa Rafa.tl