Brazil Kampeaun Grupu C Hafoin Halakon Eskósia 3-0

Jogadór Brazil sira selebra hafoin jogu futeból Grupu C Kopa Mundiál entre Eskósia no Brazil iha Miami Gardens. Imajen/AP

Díli, 25 Juñu 2026 (RAFA.TL)- Ekipa selesaun nasionál Brazil hakat ba faze eliminasaun hanesan Kampeaun grupu C hafoin halakon Eskósia ho ho score 3-0.

Iha jogu ikus faze apuramentu grupu C Kopa Mundiál 2026, iha Estádiu Miami, EUA, Kinta (25/06/2026), Seleção Samba rekolla vitória liu husi golu ne’ebé marka husi jogadór estrella Vinicius Junior ho Matheus Cunha.

Brazil hetan vantajen lalais iha minutu hitu bainhira jogu hahú no Rayan aproveita erru defensivu ida hosi Eskósia hodi manán pose, no passa ba Vinicius hodi remata ba rede adversáriu no marka golu  hodi muda score ba 1-0.

Ekipa Samba ne’ebé treina husi treinadór Carlo Ancelotti hetan tan oportunidade ida liu husi Vinicius, maibé golu ne’e anula hafoin revizaun VAR nian ne’ebé identifika iha falta ida molok Vinicius marka golu.

Brazil nia dominasaun kontinua, antes intervalu, Vinicius hatama nia golu daruak ho kabesa husi kruzamentu ida husi Bruno Guimarães, hodi muda score ba 2-0.

Eskósia tenta atu halo jogu ida agresivu kedasa iha inisiu segunda parte, maibé oportunidade osan-mean ida liuhosi Scott McTominay nia kabesada sei bele salva husi guarda-rede Alisson.

Brazil aumenta tan golu ida hodi muda score ba 3-0 iha minutu 60 liu husi avansadu Matheus Cunha hafoin simu pasajen ida ne’ebé fantastiku husi Bruno Guimarães no lansa kedas bola ba rede adversáriu.

Vinicius besik atu kompleta hat-trick iha segunda parte, maibé nia oportunidade oioin ne´ebe jogadór Real Madrid ne´e hetan sei bele salva husi baliza adversáriu. Iha Jogu ne’e mós marka momentu espesiál ida ba Neymar Jr., ne’ebé halo nia jogu dahuluk iha Tasa Mundiál 2026 hafoin tama hanesan substitutu iha minutu 76.

Maski nia la marka golu, maibé nia prezensa hasa’e enerjia Brazil nian iha jogu ne´e, Vitória ne’e reforsa estatutu Brazil nian nu’udar konkorente forte ba títulu. Seleção hatudu ekilíbriu entre atake ida ne’ebé maka’as no jogu ekipa nian ne’ebé sólidu.

Tuir mai Brazil sei joga iha faze eliminasaun hasoru  vise-campeaun hosi grupu F iha Jornada 32 iha Estadium Houston, iha Segunda, 29 Juñu 2026.

 Jornalista: David Gonçalves/Editór: Vito Salvadór