Boxista Timoroan Na’in-Neen Hasoru MJDAK Molok Ba Kompete iha HSS Bali

Boxista sira hasoru malu ho Ministru Nelio Isaac Sarmento, molok ba kompete iha Holywings Sport Show (HSS) Volume 10 iha Bali-Indonézia.

Díli, 21 Jullu 2026 (RAFA.TL)- Boxista profesionál Timoroan na’in-neen,  Tersa-ne’e, hasoru malu ho Ministru Joventude, Desportu, Arte no Kultura, (MJDAK), Nelio Isaac Sarmento, molok ba  kompete iha Holywings Sport Show (HSS) Volume 10 iha Bali-Indonézia, iha loron 26 fulan-Jullu tinan ne’e.

“Boxista lubuk ida Timoroan nian komesa atu partisipa iha jogu profesionál boxing nian iha Bali, eventu ida ne’e ita bolu naran HSS ne’ebé Indonézia maka promove hanesan uma-nain ba kompestisaun ne’e. Timor-Leste nian, ita lori boxista na’in-neen ne’ebé iha klase diferente atu ba kompete mós ho boxista Indonézia nian,” Ministru Nelio Isaac Sarmento informa ba jornalista sira iha salaun Magna MJDAK.

Governante ne’e hatutan, partisipasaun ida-ne’e atu loke oportunidade ba boxista profisionál Timor-Leste sira hodi hetan esperiénsia no hatudu sira nia kapasidade iha arena boxing internasional.

Nia fiar katak liuhusi kompetisaun id- ne’e, atleta sira bele prova sira nia prestasaun, aumenta konfiansa no promove naran Timor-Leste iha desportu boxing.

“Ita espera katak ho partisipasaun iha ne’eba laos de’it oinsa ita hakarak manán, maibé ita hakarak aprende ho boxista sira seluk, inklui ho ita nia promotor lokal sira, promotor Timor nian ita mos bele aprende kona-bá realizasaun eventu profisionál sira iha nasaun hanesan Indonézia,” Nelio Isaac Sarmento hateten.

Nia subliña, depois delegasaun fila husi Bali, Governu sei hamutuk ho Federasaun Boxing Amadora no promotor boxing lokal sira atu avalia no prepara eventu boxing profesionál ida iha Timor-Leste.

Iha fatin hanesan Boxista Profesionál Timor-Leste, Delio Anzaqueci Mouzinho, ne’ebé sei disputa sintu Oriental and Pacific Boxing Federation (OPBF) hasoru Saroha Lumbantobing iha eventu ne’e, hateten katak nia prepara an ona  ho di’ak atu hasoru nia adversáriu iha loron 26 fulan-Jullu ne’e.

Boxista ne’e hatutan hakarak hatudu prestasaun di’ak no realiza esperansa ne’ebé povu Timor-Leste no ekipa tomak iha ba nia. Segundu nia, iha desportu boxing manán, lakon no empate mak sai parte husi kompetisaun, maibé rezultadu di’ak depende ba preparasaun, esforsu, disiplina no servisu maka’as durante treinamentu.

“Ha’u perparadu, ha’u se’i hatudu ha’u nia jogu di’ak iha loron  26 Jullu ne’e, espera katak buat ne’ebé ita hakarak no mós povu hakarak sei sai realidade,” Delio Anzaqueci Mouzinho haktuir.

Promotor Revolta Combat, Xander Serano, hatete, atleta sira hanesan Delio, Daniel no atleta seluk sira halo promotor internasional sira aumenta interese atu konvida atleta Timoroan ba eventu sira tuir mai.

Nia hatutan boxing profesionál, la’ós de’it rezultadu manán ka lakon mak importante, maibé mós kapasidade atu hatudu luta ne’ebé atrativu no bele dada atensaun espetadór sira.

Xander Serano espera katak atleta Timoroan nain 6 ne’e bele hatudu prestasaun diak iha Bali, tanba ida ne’e bele loke oportunidade boot liu tan ba boxista Timoroan sira seluk atu kompete iha arena internasional.

“Tanba profisionál ne’e ita koalia kona-ba merkadu, ida ne´ebé mak jogu rame ema nonoton bele mai barak, ida ne’e mak sira se’i bolu, ha’u sente ho atleta sira na´in-neen ne´ebé mak ba ho Grasa Maromak Nian sira bele manan maioria, hatudu jogu di´ak se’i loke mos oportundade ba Ita Nia atleta Timoroan barak liu tan,”  Xander Serano hateten.

Eventu HSS hanesan plataforma boot ida ba kompetisaun boxing profesionál iha Indonézia no dadaun ne´e sai mos hanesan oportunidade ba atleta no boxista sira Timoroan nian atu kompete iha Arena HSS Bali hodi manan esperiensia no hetan oportunidade boot liután ba jogu internasionál seluk.

Jornalista: Davilio Valdemir/Editór: Vito Salvadór