Boxista Baucau no Covalima Prontu Duel iha Ring

Face off entre boxita sira husi Munisípiu Baucau ho Covalima.

Díli, 07 Setembru 2026 (RAFA)—Boxista sira husi Munisípiu Baucau no Covalima, prepara hasoru malu iha abertura Revolta Munisipál Boxing Battle, ne’ebé sei realiza iha Gináziu Baucau, iha loron 12 fulan-Setembru ne’e.

Duelo entre boxista munisípiu rua ne’e, sei iha intensidade jogu ne’ebé maka’as, atu prova se mak di’ak liu iha ring, no ginaziu Baucau sei sai sasin ba kapitulu foun ba dezenvolvimentu modalidade boxing iha rai-laran.

Treinadór Boxe Munisípiu Baucau, Belarmino Belo Ximenes ‘Gamboa’, hateten katak nia atleta sira halo ona preparasaun másimu ba revolta munisipál boxing battle no prontu hakat ba jogu.

“Ami Preparasaun ne’e masimu ami hahu ona fulan tolu ba kotuk, eventu revolta munisipál boxing ohin mosu ona, ne’ebé ami prontu ona atu hatudu ami nia jogu iha loron sabadu (12/09) kontra Covalima. Ami nia tarjeitu mak tenke manan, lakon ne’e opsaun seluk, maibé iha jogu ne’e ami hakarak manan duni, tanba ami sai uma na’in ba eventu ne’e,” nia  hateten.

Gamboa mós fiar katak ninia atleta na’in-10 sei hatudu sira nia  jogu  di’ak hasoru adversáriu husi munisípiu Covalima iha ring leten.

Iha sorin seluk, Treinadór Boxe Munisípiu Covalima,  Ambrosio dos Santos, sente kontente tanba munisípiu ne’e hetan oportunidade atu kompete iha eventu munisipál ne’e.

“Dahuluk ami sente kontente tanba Covalima bele iha eventu munisipál ne’e atu hasoru adversariu Baucau ami perparadu ami mai ho objetivu klaru, tanba ami mós durante ne’e treinu, nune’e ami nia alvu prinsipál mak atu manan jogu,” dehan Ambrosio ho fiar aan.

Iha kompetisaun ne’e, Munisípiu Baucau sei reprezenta husi atleta na’in-10 iha kategoria todan 48kg to’o 60kg, enkuantu Covalima mós sei hatama Boxista na’in-10 iha kategoria hanesan.

Jornalista: Davilio Valdamir