Béljika Halakon Uma-Na’in Estadus Unidus Amérika ho Score 4-1

Béljika halakon EUA. Imajen/AFP

Díli, 07 Jullu 2026 (RAFA.TL)- Béljika avansa ba kuartu-finál Kopa Mundiál 2026 hafoin halakon uma-na’in  Estadus Unidus Amérika (EUA) ho score 4-1.

Joga  estádiu Seattle, Tersa (07/07/2026), Béljika halo kedas inisiativa hodi lansa atake ba nia adversáriu EUA desde apitu abertura nia lian. Nune’e, obriga guarda-rede norte-amerikanu Matt Freese tenke halo asaun antesipadu hodi salva oportunidade oioin, inklui suta ida hosi Leandro Trossard iha minutu dahuluk.

Presaun no atake sira ne’ebé ekipa Béljika halo ikus mai fó rezultadu iha minutu sia liu husi golu Charles De Ketelaere hafoin aproveita pasajen badak husi  nia kompatriota hodi muda score ba 1-0.

EUA, ne’ebé luta atu hetan nia ritmu, konsege halo empata iha minutu 31 liuhosi bola livre Malik Tillman nian.

Bola ne’e dezvia hosi Hans Vanaken no guarda-rede Thibaut Courtois ne’ebé la antesipa ho di’ak no golu hodi muda score ba 1-1. Maibé, liu de’it minutu ida jogadór Béljika Charles De Ketelaere marka golu daruak hodi muda score ba 2-1 hafoin aproveita kruzamentu bola husi nia Leandro Trossard. To’o ba intervallu Béljika kontinua lidera jogu ne’e ho score 2-1.

Tama ba segunda parte, EUA halo jogu ida ho agresivu liu husi asaun Giovanni Reyna nian, maski nune’e, Béljika maka aumenta sira nia vantajen iha minutu 57 hafoin guarda rede EUA Matt Freese halo erru ida ne’ebé maka’as hodi sai hosi nia área penalti no lakon bola, ho nune´e jogadór Béljika Hans Vanaken aproveita oportunidade ne’e hodi marka golu ba rede mamuk no muda score ba 3-1.

Situasaun EUA nian sai aat liu bainhira kapitaun Christian Pulisic tenke husik kampu tanba hetan lezaun iha minutu 59.

Tuirmai Béljika halo subtituisaun ba jogadór estrela oioin, inklui Romelu Lukaku no Jeremy Doku, hodi mantein jogu nia intensidade.

EUA tenta atu hamihis golu ne’ebé iha, maibé oportunidade oioin la konverte tanba dezempeñu sólidu Courtois nian iha baliza Béljia nian.

Tama ba tempu estra, Romelu Lukaku marka vitória Béljika nian ho golu ida iha minutu 90+3 hafoin simu pasajen ida hosi Hans Vanaken.

Golu ne’e asegura vitória konvinsente ida ba Béljika ho score 4-1 hasoru uma-na’in EUA.

Iha jogu tuir mai, Béljika sei hasoru nia adversáriu España iha kuartu-finál Kopa Mundiál 2026 iha Estádiu Los Angeles, Sábadu, 11 Jullu 2026.

Jornalista: David Gonçalves/Editór: Vito Salvadór