Batsy Marçal, Okupa Primeira Lugar iha Off-Road Internasionál 2026

Manan na'in sira ba Dili Internasional Off-road 2026.

Díli, 13 Setembru 2026 (RAFA) – Off-Roader femenina Timor-Oan, Batsy Maçal, konkista kampiaun primeira lugar iha kompetisaun Off-Road  Internasionál 2026.

Iha kompetisaun ne’e timor-oan husi klubu Oka Laran Diak Racing Team, Batsy Marçal kompete ho durasaun loron rua iha kategoria klase dahuluk  SCS 10 Point 90 no Penalti SCS ronde daruak 0 Point 100  no MPTC 30  ho totál Point hamutuk 220.

Ho rezultadu ne’e  lori off-roader Batsy Marçal  sai vensedora  rekolla medalla no osan.

Off-Roader, Batsy Marçal  informa katak antes tama ba kompetisaun nia parte halo preparasaun ida adekuadu liu-liu kona -ba preparasaun mentalidade no fiziku.

“Mezmu ida ne’e la’ós primeira vez ba ha’u tuir kompetisaun, ha’u nafatin treinu no ha’u nafatin fó esforsu tomak ba iha komptisaun ida ne’e,’’ Batsy Marçal ba jornalista sira iha Dolok-Oan, Domingu-ne’e.

Reprezentante Off-Roader  Provinsia Nusa Tengarah Timur (NTT) Abdul Risky ne’ebé okupa mós iha kintu lugar  hato’o mós nia sentimentu kontente, tanba bele partisipa iha kompetisaun dezde inisiu to’o remata.

Maibé,  iha mós sentimentu oioin ne’ebé difísil atu hatete ho liafuan, hahú husi inísiu to’o ikus bainhira sai kampiaun, hotu-hotu Mistura.

“Iha klase Free for All, tubelar no la’ós tubelar, ho kapasidade 0 to’o 1.600 CC. Iha klase 1.600 CC, ha’u hetan pozisaun 5, no iha EBFA, ha’u hetan pozisaun 6,” haktuir  Abdul Risky.

Husu Komisaun Kada Tinan Realiza Dala Rua

Fatin hanesan Ministru Obras Publiku (MOP), Samuel Marçal, husu propoin ba Komisaun Organizadora Off-road kontinua realiza eventu kada tinan ida dala-rua, tanba  eventu referida bele kria amizade entre joven sira, liu-liu kria lasu amizade entre nasaun viziñu sira.

Reprezentante Governu hatete sira sei nafatin fó apoiu tanba eventu referida maneira ida hametin relasaun Timor-Leste ho Indonézia.

Nia espera katak atividade ne’e labele para iha ne’e de’it kontinua nafatin, tanba parte governu apoiu nafatin ba serinonia sira hanesan ne’e.

“Se bele tinan ida bele dala rua. Tanba, ita nia joven barak presiza animasaun hanesan ne’e,” Samuel Marcal iha nia diskursu enseramentu ba eventu off-road Dili Internasional Off-road.

Governante apresia eventu ne’ebé halibur juventude no hametin unidade entre Timor-Leste no Indonézia. Tanba, ne’e nia hato’o Primeiru parabens ba Comisaun organizadora ne’ebe iha ideis ne’ebé bele dehan brilian tebes, hodi bele kria amizade ne’ebe diak entre joven sira iha Timor Leste no no viziñu sira husi Kupang.

“Atividade ne’e la’ós atividade simples, maibe atividade ne’ebé kontribuisaun boot tebes ba ita nia amizade ne’ebé nasaun nia presiza,” Samuel Marcal afirma.

Prezidente Federasaun Off-road Timor-Leste, Manuel de Araujo, orgullu ho Governu nia kompromisu atu apoia, no nia parte prontu atu realiza.

“Ba ami kontente, orgullu kuandu governu fasilita, tinan ida Dala hat, dala lima diak liu tan. Maibe, ohin ita rona rasik husi governu hatete tinan ida dala rua, ne’e diak liu. Ami fo obrigado ba exelensia Ministru Obras Publiku,” Manuel de Araujo subliña.

Kompetisaun Off -Road klasse hamutuk hitu ho kategoria klasse ne’ebé diferente bainhira partisipante off-roader sai kampeaun iha klasse  4 vezes 2  primeiru lugar hetan  US$300, Segundu US$200, Terseiru US$75,  Kuartu US$50.

Klasse Free For World Feto Primeiru lugar  US$500, Segundu US$300, Terseiru  US$200, Kuartu  US$100, Kintu US$75.

Klasse internasionál 0 to’o 1600 CC ,Primeiru lugar US$1000, Segundu US$500, Terseiru US$150, Kintu US$100.

Klasse Appel 40.0000 , Primeiru US$1000, Segundu US$500, Terseiru US$250, Kuartu US$150, Kintu US$100.

Eventu Dili Internasional Off-road 2026  realiza durante loron rua; Sábadu-Domingu, 12-13 Setembru ne’e, partispa husi off rouder 28 kompostu husi Uma-na’in (Timor-leste) 11 no husi NTT Indonesia na’in-17.

Jornalista: David Gonçalves/ Marito da Costa