Autoridade Timor-Leste Hahú Investiga Kazu Overstay Ne’ebé Sidadaun Indonézia Halo Virál iha Mídia Sosiál

Diretora Ezekutivu Migrasaun, Superintendente Xefe Polísia Natércia Eufrásia Soares Martins, lidera enkontru servisu MIgrasaun nian, Segunda (23/02/2026). Imajen/Rafa.tl

DILI, RAFA.tl– Autoridade Timor-Leste kompostu husi Ministériu Interiór (MI) ho Servisu Migrasaun,  hahú halo identifikasaun no investigasaun ba kazu  overstay sidadaun ka feto Indonézia ida halo virál iha mídia sosiál.

Ministru Interiór, Francisco da Costa Guterres ba jornalista sira iha Ministériu Finansas, Díli Segunda (23/02/2026), informa, servisu Migrasaun Timor-Leste hahú ona identifikasaun kona-bá kazu overstay ne’ebé sai virál iha mídia sosiál.

Iha mídia sosiál Facebook, sidadaun feto ida ho nasionalidade Indonézia  nia passaporte atu inválida, maibé liu husi portu entrada Batugade, Munisípiu Bobonaro, funsionáriu husi Migrasaun , deskonfia fasilita liu de’it la aplika multa ka koima, mas taka karimbu alerta iha Passaporte no  husu númeru WhatsApp.

“Horikalan diretora jerál Servisu Migrasaun  fó hatene ona, sira sei halo investigasaun, kuandu iha investigasaun maki ha prova  nia sala, tenke foti medida hasoru nia, ne’ebé ida ne’e lolós haré husi señora ne’e tenke deporta nia no bandu nia labele tama mai Timor-Leste,  tanba ninia passaporte mate. Ida fasilita nia liu tiha de’it laiha sansaun, ita investiga lolós nia mòs sei hetan sansaun. Agora Servisu Migrasaun halo hela investigasaun depois mak sira relata mai ita hatene,” Ministru Interiór Francisco da Costa Guterres hateten.

Ministru Interiór Francisco da Costa Guterres orienta ona Diretora Ezekutivu Migrasaun hodi halo investigasaun ba kazu ne’e para hatene nia faktu ne’e mosu duni indisu iregularidade ba problema ne’e.

Iha fatin seluk, Diretora Ezekutivu Migrasaun, Superintendente Xefe  Polísia Natércia Eufrásia Soares Martins hatete, prosesu investigasaun sei la’o tuir lei no regulamentu  ne’ebé vigora no sei fó informasaun ofisiál ba públiku depoiz remata análize kompletu.

“Horseik orienta diretor levanta para hahú  forma ona ekipa investigadór ida, agora dau-dauk sira halo hela preparasaun no sira desloka ba terenu hodi rekolla informasaun hotu, kona-bá akontesimentu ne’e, maibé hakarak hato’o ba públiku katak, ne’e la’ós foin akontese, maibé  iha kedas loron  27 fulan-Janeiru, mas foin mak individu balun hatene informasaun ne’e fó sai iha mídia. Tanba ne’e maluk barak hatutan iha mídia sosiál,” Superintendente Xefe Polísia  Natércia Eufrásia Soares Martins afirma.

Nia agradese ba Públiku ne’ebé ajuda passa ona informasaun ne’ebé hato’o ba parte kompetente hodi tau iha konsiderasaun no forma ona ekipa ida hodi halo identifikasaun no investiga.

Nia subliña, bainhira iha investigasaun ne’e rekolla  prova sira hatudu ninia aktu sira ne’e maka sei kondena tuir lei ne’ebé vigór iha migrasaun, maibé presiza ninia rezultadu investigasaun finál. Tanba tuir relatóriu husi Postu Batugade nian aprezenta ona mai Migrasaun, ne’ebé ekipa investigasaun sei uza sai referénsia hodi hatene nia prosesu los no sala sira ne’e.

“Sei halo kordenasaun ho Embaixada Indonézia iha Timor-Leste hodi buka tuir pesoál ida ne’ebé ko’alia iha mídia sosiál ne’e hodi hetan nia evidénsia ba prova passaporte ne’e viza ne’e tau duni karimbu Alerta ka lae,” Tenik nia.

Reportajen ekipa Rafa.tl