Autór Sira Ne’ebé Hakanek Membru CSP Tenke Ba Hatán iha Tribunál

Ministru Interiór (MI), Francisco da Costa Guterres. Imajen/Rafa.tl

DILI, RAFA.tl– Ministru Interiór (MI), Francisco da Costa Guterres, afirma  autór sira ne’ebé hakanek membru Korpu Seguransa Pesoál (CSP, sigla portugés), Ajente Prinsipal  Polísia Joselino Arcanjo Tomae tenke ba hatán iha Tribunál hodi responsabiliza ba aktu kriminál ne’ebé sira komete.

Notísia Relevante: Polísia Kaptura Joven Na’in-hitu Ne’ebé Sona Membru CSP Joselino Arcanjo Tomae iha Vila-Verde

Ministru Interiór Francisco da Costa Guterres, ba Jornalista sira iha resintu Parlamentu Nasionál, Kinta (20/11/2025), husu Polisia Nasionál Timor-Leste (PNTL) atu foti medida forte ba autór sira ne’ebé hakanek Ajente Prinsipal  Polísia Joselino Arcanjo Tomae iha parte kakorok, liman loos nian, iha Vila-Verde, Kinta dadeer (20/11/2025), hale’u tuku 04:00 Otl.

Governante ne’e afirma, agora daudaun investiga no  buka tuir hela kazu referé no hetan autór sira-ne’e prontu ba hatán tanba hahalok ne’e hatudu katak indisiplinadu no hatudu mós katak sira komete ona krime tenke ba hatán iha Tribunál.

“Bainhira justisa deside oinsá tenke kumpre, mas ita buka para kazu sira hanesan ne’e labele akontese tán, nune’e tenke foti medida,” Francisco da Costa Guterres afirma.

Tuir nia, PNTL ne’e autór ordem públika, tanba ne’e, kualkér ema sé de’it buka atu estraga nia mós iha lejitimidade autodefeza, ne’e lei iha  bolu dehan prosedimentu legál no iha prosedimentu operasionál hakerek hela, mas tenke kuidadu para labele rezulta vitima, no buka tuir autór sira ne’e tenke impoin ba regra sira ne’ebé aplikavel.

Ministru Interiór subliña, joven sira ne’ebé mak halo asaun ne’e krime, hakarak estraga estabilidade no hakarak kria problema iha komunidade.

Reportajen Ekipa Rafa.tl