Atleta Timoroan Buka Aprende husi Rosa Mota

Ministru Juventude, Desportu, Arte no Kultura (MJDAK), Nelio Isaac Sarmento, enkoraja atleta Timoroan sira ne’ebé iha paixaun ba atletismu atu aprende husi Rosa Maria Correia dos Santos Mota, atleta senior husi Portugál.

Díli, 06 Agostu 2026 (RAFA)- Ministru Juventude, Desportu, Arte no Kultura (MJDAK), Nelio Isaac Sarmento, enkoraja atleta Timoroan sira ne’ebé iha paixaun ba atletismu atu aprende husi Rosa Maria Correia dos Santos Mota, atleta senior husi Portugál ne´ebé kontinua hatudu prestasaun no konviksaun forte ho disiplina iha modalidade atletismu.

“Ha’u primeira vez hasoru Rosa Mota hanesan ne’e no iha Dili Internasionál Marathon la’ós deit kontente ho nia prezensa, maibé bele mós motiva ita nia atleta sira hotu, idade ida hanesan Rosa sei iha nfatin  paixaun ba marathon, nusá mak ita nia jerasaun sira tuir mai labele. Ho nia prezensa motiva  ita-nia atleta sira,” Ministru Nelio Isaac Sarmento informa ba RAFA iha nia knar fatin, Díli,  Kinta-ne’e.

Governante ne’e hatutan ho prezensa atleta refere ba futuru baihira estadu no governu kria programa importante balu liu-liu iha atividade atletismu nian, alteta ne’e bele sai orientadór  ba atleta sira.

“La ko´alia kooperasaun, ne’e hanesan ha´u koalia ba mais ha’u sente katak depois ho nia prezensa iha ne’e ita haré took ba aban bainrua, karik estadu ka govenu ne’e iha programa ruma ba atletismu nian, nia bele sai hanesan mentor ba atleta marathon sira iha ita nian,” nia hateten.

Tuir oráriu Dili Internasionál Marathon edisaun ba dala-10 iha tinan ne’e envolve atleta rihun tolu liu ho kategoria full marathon sei partisipa husi atleta hamutuk 200 no half marathon (meia marathon) sei tuir husi atleta 400.

Jornalista: David Gonçalves