Atleta Taekwondo Ana Belo Preparadu Partisipa Asian Games 2026

Atleta Taekwondo, Ana Costa Pinto Belo.

Díli, 1 Setembru 2026 (RAFA) – Atleta modalidade Taekwondo, Ana Costa Pinto Belo, hala’o ona preparasaun másimu hodi partisipa kompetisaun iha Asian Games Aichi-Nagoya Japaun 2026.

“Ha’u halo ona preparasaun sedu, komesa husi fulan kotuk. Agora ha’u prontu atu kompete,” Ana Costa Pinto Belo ba RAFA iha Gimnáziu Díli, Segunda-ne’e.

Ana Belo afirma katak nia sente konfiansa no prontidaun atu kompete, ho esperansa bele hatudu rezultadu di’ak husi preparasaun ne’ebé nia hala’o iha Korea no Timor-Leste, no lori naran Timor-Leste iha eventu internasionál ne’e.

Nia hatutan, durante prosesu preparasaun, treinamentu la’o ho di’ak, maibé nia sei kontinua hadi’a aspetu balun, liuliu iha téknika, kondisaun fiziku no mentalidade.

Atleta  Taekwondo ne’e haktuir kona ba preparasaun  la’o ho di’ak, nia  sente katak progresu iha ona. Maibé, presiza hadi’a tan aspetu balun, liuliu kona-ba failansu sira, kondisaun fiziku no mentalidade.

“Ita sei hasoru eventu boot hanesan Asian Games, ne’ebé eventu importante tebes,”  atleta  Taekwondo ne’e dehan.

Ana Costa Pinto Belo  la promete medalla, maibé nia iha objetivu klaru atu hatudu performa di’ak  hodi bele fó rezultadu pozitivu iha Asian Games 2026 iha Japaun.

Asian Games Aichi-Nagoya Japaun 2026, sei  ofisializa iha loron 19 fulan-Setembru ne’e.

Jornalista: Marito da Costa