Atleta Isabel Alves Guterres Kontente Hala’o Maratona Da-huluk iha DIM 2026

Timoroan sira entusiazmu partisipa no asiste evnetu Díli Internasionál Maratona, Sábadu 8 Agostu 2026.

Díli, 08 Agostu 2026 (RAFA)- Atleta atletismu Timor-Leste, Isabel Alves Guterres, kontente halo nia maratona da-huluk iha Díli Internasionál Maratona (DIM) 2026 iha klase meia maraton ho kilometru 21.

Iha entrevista ho RAFA, Sábadu-ne’e, atleta feto foin-sa’e ne’ebé ho númeru dorsal 68 ne’e esperesa  nia sentiment haksolok tanba bele partisipa ba primeira vez iha Dili International Marathon 2026.

Atleta ne’e konsidera partisipasaun ida-ne’e hanesan oportunidade no apresiasaun ba Timoroan sira, liuliu atu kontinua promove no hasa’e interese no koñesimentu komunidade kona-ba modalidade korida.

“Ha’u  kontente tebes tanba foin primeira ves tuir maraton ida ne’e, ne’e hanesan apresiasaun ida ba ita Timoroan hodi bele hasa’e ita nia koñesimentu korida hala’i nian no ne’e di’ak ba saúde,” Isabel Alves Guterres hateten.

Nia hatutan partisipasaun ne’e sai oportunidade importante ba atleta ne’e atu hatudu nia kapasidade no hetan esperiénsia iha kompetisaun atletismu ho partisipasaun atleta sira husi rai oioin.

Ho esperiénsia ne’ebé nia hetan liuhusi partisipasaun dahuluk iha Dili International Marathon 2026, atleta feto ne’e sente motivadu liután no iha interese atu kontinua partisipa no kompeti iha eventu atletismu sira seluk iha tempu oin mai.

“Ba oin ha’u se’i esforsu nafatin para kompete ho atleta sira internasional no nasional ha’u sente orgullu tebes tanba ne’e ba dahuluk tuir maraton iha Dili internasional Marathon 2026 nian” nia dehan.

Maski ida-ne’e mak nia partisipasaun dahuluk, atleta feto ne’e sente katak nia sei iha kapasidade no forsa atu kontinua treinu no partisipa iha kompetisaun sira iha futuru.

Motivasaun boot ba nia mai husi prinsipiu katak, se ema seluk bele halo, nia mos bele. Tanba ne’e, nia iha determinasaun atu hasa’e tan nia kapasidade, desafia an no kompete ho atleta sira seluk, hodi hatudu katak atleta Timor-Leste mos iha kapasidade atu kompete iha nivel internasionál.

Ida ne’e foin tuir primeru maibé Ha’u sente ha’u nia forsa se’i iha hodi ha’u bele kontinua nafatin iha tinan oin treinu nafatin Buat ne’ebe mak motiva ha’u mak ha’u sente ema seluk bele tanba saida ha’u labele ne’e Mak ha’u mos hakarak habrani ha’u nia aan hodi bele kompete ho ema seluk atu hatudu katak Timor mos bele.

Díli internasionál Maratona 2026 ba korida 21 kilometru kompete hosi atleta nasionál no internasional hamutuk 400.

Jornalista : Davilio Valdamir