Atleta Halterofilismu Prontu Reprezenta Timor-Leste iha Asian Games Aichi-Nagoya

Atleta Ester Elisaria Alves.

Díli, 09 Setembru 2026 (RAFA)- Atleta nasionál husi modalidade Halterofilismu Timor-Leste kontinua halo preparasaun intensivu atu partisipa iha kompetisaun internasionál Asian Games iha Aichi-Nagoya, Japaun.

Treinadór modalidade Halterofilismu, Martinho Ferreira de Araujo, ba RAFA, Kuarta-ne’e, haktuir, maski enfrenta difikuldade, liuliu tempu preparasaun ne’ebé limitadu, ekipa treinadór no atleta sira kontinua esforsu maka’as atu prepara an ho di’ak.

“Tempu preparasaun limitadu tebes, ita iha de’it besik fulan ida no semana rua. Maibé ami nu’udar treinadór kontinua esforsu maka’as atu prepara atleta sira, atu bele kompete ho di’ak no reprezenta Timor-Leste ho dignidade,” Treinadór modalidade Halterofilismu, Martinho Ferreira de Araujo hateten.

Treinadór ne´e esplika katak, husi parte treinadór la fó presaun boot ba atleta atu hetan medalla, maibé espera atleta sira bele hatudu rezultadu di’ak no hadi’a sira nia rekord pesoál durante kompetisaun iha Nagoya.

Atleta feto, Ester Elisaria Alves hatete, preparasaun ba Asian Games lao ho di’ak, no nia kontinua halo treinu kada loron atu prepara an ba kompetisaun. No durante períodu preparasaun, atleta sira simu apoiu hodi hela iha fatin apropriadu no konsumu alimentasaun ne’ebé di’ak, atu bele fó kondisaun di’ak ba prosesu treinu.

Attleta ne´e mós iha alvu ba Asian Games mak atu hadi’a nia record no hetan rezultadu ne’ebé di’ak liu kompara ho rezultadu iha SEA Games.

“Ha’u espera katak iha Asian Games bele hadi’a ha’u nia record no halo di’ak liu fali SEA Games. Maibé la fasil tanba ami nia oponente sira prepara ona durante tinan barak,” hatete Ester Elisaria Alves.

Atleta mane Nivio Fernando da Costa Silva Soares haktuir katak nia sente kontente no orgullu tebes tanba hetan oportunidade atu reprezenta rai doben Timor-Leste iha kompetisaun interNasionál iha Nagoya, Japaun.

“Ha’u sente kontente no orgullu tebes atu reprezenta rai doben Timor-Leste iha kompetisaun interNasionál iha Japaun, Nagoya. Ba ha’u, preparasaun hotu lao ho di’ak,” hatete Nivio Fernando da Costa Silva Soares.

Atleta na´in-rua ne’e se’i kompete iha klase ne’ebé diferente, atleta feto Ester Elisaria Alves se’i kompete iha klase 57 kg no atleta mane Nivio Fernando da Costa Silva Soares sei kompete iha klase 70 kg.

Jornalista: Davilio Valdamir