Asosiasaun HAK Konsidera Rekrutamentu Ba Kandidatu PNTL Na’in-400 Viola Prinsípiu Boa Governasaun

Asosiasaun HAK lamenta ho prosesu rekrutamentu ba kadetes PNTL ne'ebé deskonfia hamosu prátika familiarizmu. Imajen/Rafa.tl

DILI, RAFA.tl– Asosiasaun HAK konsidera rezultadu  rekrutamentu ba kandidatu Polísia Nasionál Timor-Leste (PNTL) na’in-400 ne’ebé komisaun rekrutamentu fó sai hodi haka tba faze teste médiku viola prinsípiu Boa Governasaun tanba lista ne’e domina ho familiarizmu.

Notísia Relevante: PDHJ Husu Suspende no Re-Anúnsiu Konkursu Públiku Foun Ba Kandidatu PNTL

Asosiasaun HAK nu’udar organizasaun Naun-Governamentál, ne’ebé servisu iha área direitus umanus observa katak, prosesu rekrutamentu Polísia Nasionál Timor-Leste (PNTL) ne’ebé dau-daun la’o hela mak momentu importante atu kontinua fortalese profisionalizmu, integridade no konfiansa públika ba forsa seguransa Estadu nian.

Haré ba nesesidade seguransa iha rai-laran mak Konsellu Ministru deside hodi  loke vaga ba kandidatu foun PNTL liu husi Diploma Ministeriál númeru 17/2025, 25 Juñu altera ona ho Diploma Ministeriál númeru 37/2025, 10 de Outubro kona-bá rekrutamentu ba ajente Polísia Nasional Timor-Leste.

Rekrutamentu ne’e importante tebes tanba PNTL mak instituisaun seguransa públika ne’ebé iha papél estratéjiku atu proteje no garante seguransa ba sidadaun sira  iha Estadu direitu demokrátiku.

“Ami apresia no rekoñese esforsu husi  Governu no instituisaun relevante sira ba polítika rekrutamentu ida-ne’e, maibé  hanesan organizasaun direitus umanus ne’ebé tau matan ba asuntu direitus umanus hakarak subliña katak, rekrutamentu PNTL presiza la’o tuir prinsípiu legalidade, transparénsia, méritu, imparsialidade, igualidade no oportunidade, tuir prinsípiu direitus umanus no enkuadramentu legál sira ne’ebé vigor,” Marina Galucho hateten.

Porta-voz ne’e Asosiasaun HAK ne’e hatutan, liu husi rezultadu ne’ebé Komisaun Rekrutamentu PNTL publika lista jerál kandidatu foun ho totál 12.874, no husi númeru ne’e, iha kandidatu 10.597 mak aprovadu, no kandidatu 2.277 mak la aprovadu.

Husi númeru aprovadu ne’e fó prioridade ba kandidatu 400 ne’ebé tuir kuota kada munisípiu mak sei ba teste médiku, no  situasaun ne’e sai polémika iha públiku, inklui  hetan reasaun maka’as husi kandidatu sira tanba konsidera naran aprovadu hotu iha lista, maibé la admiti ba teste médiku.

Asosiasaun HAK konsiente katak iha indikasaun forti mós lista kadetes foun sira ne’ebé aprovadu ba teste médiku maioria oan husi superiór sira PNTL nian.

Asosiasaun HAK husu ba Ministériu Interiór no Komandu Jerál PNTL atu imediatamente  anula desizaun ba lista kandidatura 400 ne’e no mós husu ba Provedór Diretus Umanus no Justisa  atu halo investigasaun ne’ebé kle’an hodi hatene tendénsia ba prátika sira ne’ebé viola prinsípiu Boa Governasaun.

Asosiasaun HAK mós   husu ba Parlamentu Nasionál liuhosi Komisaun B ne’ebé trata asuntu Negósiu Estranjeiru, Defeza ho Seguransa, atu halo fiskalizasaun ba prosesu rekrutamentu ne’ebé iha tendénsia kontra prinsípiu Boa Governasaun.

HAK fiar katak rekrutamentu PNTL ne’ebé la’o ho padraun di’ak no kredível sei kontribui ba harí forsa polísia ne’ebé profisionál, disiplina no respeita ba prinsípiu direitus umanus. Apresia ba kandidatu kadetes Foun PNTL ne’ebé hatudu maturidade ba buka lia lós no justisa ho dalan legál no demokrátiku.

Iha fatin hanesan, vise-diretór Asosiasaun HAK, Antonino de Limas, fiar katak Xefe Governu liu husi Konsellu Ministru bele buka  solusaun ba  problema kandidatu foun PNTL ne’ebé halo protesta ba lista  kandidatu 400 ne’e.

“Karik Kuarta (11/02/2026), akontese enkontru Konsellu Ministru atu rezolve problema ida ne’e, hatudu katak Estadu liu husi Governu tau duni sira nia kompromisu atu rezolve problema ne’ebé mosu ne’ebé involve foin-sa’e barak nia esperansa no  husu ba Primeiru-Ministru atu fó orientasaun hodi hakotu desizaun  ne’ebé di’ak bele fó klaramente hodi rezolve problema ida-ne’e,” Antonino de Limas hateten.

Tuir informasaun ne’ebé HAK simu, iha kandidatu balun mak iha teste, monu iha terenu, ne’ebé sira bele pasa, ne’e Polísia nia oan sira barak, sira balun nia oan na’in-rua pasa hotu iha lista.

Tuir Asosiasaun HAK nia perspetiva, desizaun ne’e lolós seidauk finál, tanba sei iha faze teste saúde nian, bainhira kandidatu sira 10,597 ne’e ba hotu tuir teste médiku labele sira 400 ne’e de’it.

Nia afirma tan bainhira ba teste médika maka bele fó sai rezultadu ne’ebé maka tuir vaga presiza ajente 400 ne’e iha razaun, maibé labele hamosu polémika hanesan akontese dau-daun, tanba deskonfia iha indísiu forte ba sistema familiarizmu.

Reportajen ekipa Rafa.tl