Asosiasaun Ambassadors of Love ho Komunidade Relijiozu Timor-Leste Halo Limpeza Jerál iha Cristo Rei

Asosiasaun Ambassadors of Love ho Komunidade Relijiozu Timor-Leste selebra loron domin ho limpeza jerál iha Cristo Rei, 14 Fevereiru 2026. Imajen/Rafa.tl

DILI, RAFA.tl– Asosiasaun Ambassadors of Love hamutuk ho komunidade relijiozu iha Timor-Leste, selebra loron domin (Valentine’s Day), ho atividade Limpeza Jerál iha sítiu turizmu Cristo Rei.

Atividade limpeza jerál ne’ebé hala’o iha Sábadu (14/02/2026),  ho intensaun atu hatudu ba ema hotu katak loron domin la’ós ba ema ho ema de’it, maibé oinsá ema hatudu  domin ba natureza ho konsentra ba tema prinsipál “haburas diversidade joven sira nian”.

Vigáriu Episkopál ba Asuntu Sosiál sira, Pe. Aniceto da Costa Maia, hatete, beleza la’ós frakeza, maibé beleza hanesan rikeza ida, tanba ne’e  orgullu iha diversidade, kria unidade iha diversidade, ho nune’e, uniaun la’os uniformidade, se lae ema halakon beleza biodiversidade ninian.

“Ohin loron, ita mai la’ós tanba ita hanesan, maibé ita hotu pertense ida de’it, katak atu kria uma ida ne’ebé ho nia ambiente saúdavel, ida ne’e presiza ema ida-idak nia konsiénsia, tanba ne’e ho atividade ne’e hasa’e Timoroan ida-idak nia konsiénsia, oinsá atu kria ambiente ida ne’ebé saudável ba Timoroan sira hotu,” Amu Aniceto da Costa Maia hateten.

Nia tenik, “ba ida ne’e ita tenke servisu duni hodi hasai kosar-been, karik ita servisu extraordináriu, nia valór mós extraordinária, se ita hasai kosar-been mak ita sei ku’u ho ksolok, hanesan Salmista dehan, se mak kuda ho mata-been, sei ku’u ho ksolok.”

Saserdote ne’e reforsa liután katak, joven Timoroan sira tenke prontu sakrifika aan, tanba imi la hetan buat ida ne’ebé ho kualidade, se imi la sakrifika aan, tanba ne’e mai fó liman ba malu maske  diferente, maibé mehi ida de’it atu kria uma ne’ebé saudável.

Iha sorin seluk, Administradór Postu-Administrativu Cristo Rei, Fernando Araújo, sujere ba responsável atividade ne’e, halo tan atividade karik, diretamente ba iha komunidade nia leet, hodi nune’e, komunidade mós bele sente aan katak, ohin sira bele soe lixu arbiru, maibé atividade ne’e fó exemplu ona ba sira, ikus mai sira sei kumpri, nei-neik maibé bei-beik  sei bele.

“Ita haré Timor ukun aan tinan 24 ona, maibé  lixu de’it mak ita labele kombate, la hatene nia impaktu mak saida, ita nia konsiénsia mak laiha ka presiza kria lei ruma hodi fó kontribuisaun ruma karik, soe lixu multa sentavu 10, atu nune’e ita nia komunidade sira bele komprende,” Administradór Postu-Administrativu Cristo Rei, Fernando Araújo hateten.

Iha fatin hanesan, Prezidente Asosiasaun Ambassadors of Love, Carlito Armindo de Sousa, informa, ema hotu selebra Valentine’s day, maibé sira-nia parte transforma loron ne’e sai hanesan loron ne’ebé la’os ema ho ema mak hadomi malu de’it, maibé hadomi mós  natureza ka ambiente iha Timor-Leste.

Objetivu mai konsentra Crito Rei husi kongregasoens relijiozu oioin, maluk sira husi protestante, maluk sira husi igreja Katólika no Musulmanu, ho tema prinsipál ba iha atividade limpeza jerál, “Haburas Diversidade Joven Sira Nian”, katak  mai husi diferensa relijiaun, diferensa grupu, maibé  nafatin unidade, nafatin ida de’it hodi servisu hamutuk hodi bele halo buat ruma ba iha sosiedade no nasaun.

“Atividade limpeza ne’e sei la to’o iha ne’e, maibé sei iha kontinuasaun, katak maluk sira ne’ebé ohin akompaña iha limpeza ne’e sei kontinua sensibiliza iha sira nia família, iha sira nia komunidade, iha sira nia eskola, no iha fatin ne’ebé sira hela ba hodi implementa saida mak dehan ambiente no beleza ne’ebé furak iha moris,” Prezidente Asosiasaun Ambassadors of Love, Carlito Armindo de Sousa esplika.

Partisipa iha atividade limpeza ne’e,  estudante sekundária sira husi eskola oin-oin, internasionál school sira, Asosiasaun no organizasaun juventude sira, grupu kategoriais Igreja nian, kongregasaun husi Madre sira, Frater no Amu sira.

Reportajen ekipa Rafa.tl